هذي قصيدة مشاركة من الشاعر عبدالوهاب المناع
ولم يستطع انزالها لدواعي سفري
ونعتذر للمشرفين عن التأخر عن نشرها
عاااد ان قبلتوها والا كيفكم
يا بجاد لا تنشد عن الحال يــــا بجاد = حـــــــالي كما طير عديم الهدادي
يبــغا الــهدد ومقــيـدينه بالأقـــــياد = سبعة شهــور حالــــته في ترادي
نفسي تراودني أســــافر عـلى بلاد = فيها القنص يا بجاد وزود البرادي
حـــــر بنجد يحــرق الــــخد والزاد = يحـرق مراويح الغـزل والغـــوادي
تشوي سمومه حزة الظـــهر لا جاد = حـر(ن) سرابه في البيادي ينـادي
يـا الله يـا المعبود يـا رب الــعــــباد = تهــل مــزن السـيف فـوق البيادي
تنبت منابيت المراعي والأجــــــواد = عشب(ن) يضيق كثرته كـل وادي
فيـــــها طيــور نازحـات بالانـــشاد = تشرب مـن الغـدران وقــت مدادي
أشوف ليل الصيف مثل الشتاء عاد = سهل(ن)على المعبود رب العبادي
يـزيـل همــي وينطـفي كل حســــاد = أطــــالع الوديان وأهـــل الحصادي
تعـم مجالـــسنا بخـــيرات الأعــياد = صحــونها بالخــير حيل(ن) وزادي
أركــــي دلال بـــها الــبن وجـــداد = أســـامر القـــمرا بـــوسط البــوادي
أراقب اللــي رابطــــينه بميـــــعاد = أهــل العــلــوم الطــيبة والـوكــادي
قلت الشعر وأنا بعيد عن الــــواد = حسبي مع الشــعار نلـت المـــرادي
حبـي لديني والـوطن مـا به عنــاد = حب(ن) قــديم للــوطن بازديــــادي
والخــاتمة صلوا على سيد الأسياد = المصطفى محــمد شفــيع التــنادي
سلام
2009-06-11, 05:27 PM
العرض الشجري