السلام عليكم ورحمة الله وبركاته
قصيدة الشاعر فهد المفرج في حفل معايدة عيد الفطر (تمير) ١٤٣٦هـ
سلام عيد و نابعٍ من مصافيه /
تسليمةٍ با غلا العطور مختومه /
نبع الغلا تسليم غالي لغاليه/
للشاعر المبدع مع الشعر حومه/
زان القصيد و جمّل الله قوافيه/
يفرض على راعي المشاعر رسومه/
و شعرٍ بليا روح ما نيب ادانيه/
و قولٍ بليا حق ما نيب ارومه/
شاعر و يهدي بالمشاعر معانيه/
و الحمد لله طيّباتٍ اقسومه/
متوكلٍ بالله ولا نيب ناسيه/
يا الله عسى ستره علينا يدومه/
امشي على امره و اتجنّب نواهيه/
يا الله عسى نفسي ما هيب محرومه/
يا سرع دورات الزمان و مماشيه/
وقتٍ يزايمنا و حنا نزومه/
راح رمضان و ودّعتنا لياليه/
شهرٍ كتبه الله علينا نصومه/
و العيد هلّ هلاله اللي نراعيه/
من مرصد اهل تمير بثّوا علومه/
شفناه و اعلنّاه و الحق نبديه/
و في المحكمه ثبّت شهادة قدومه/
و على البراري بشّروا به عوانيه/
يبثّ ابو ناصر و ياسم وسومه/
العيد بالجمعه و زفّوا تهانيه/
وكلٍّ على قدّه يفصّل هدومه/
و انا اتصل بي صاحب الحفل راعيه/
القرم ابو راكان راعي تنومه/
الشهري اللي طيباتٍ مجانيه/
الكفو يعزم و الرجال معزومه/
قال القصيده قلت لبيه لبيه/
رجلٍ قصر عن واجبه وش لزومه/
وجينا على الموعد و شفنا مباديه/
الزلّ يفرش و الضيوف محشومه/
و العود الازرق فايحاتٍ نواشيه/
من واردات الهند و اليوم يومه/
و القهوجي على يمينه يباريه/
و الهيل خاثر و الدلال معسومه/
يا زين ترتيبه و نيرة مبانيه/
هذي تصاميمه و هذي رسومه/
نقدّر جهوده و نشكر مساعيه/
جازم و نفسه باللوازم جزومه/
يا ليل يا ليل السعد وش نسميه/
الجو رايق و الامور محسومه/
مابه مجالٍ للزعل و المشاريه/
وساوس الشيطان شبه معدومه/
عيد و فرح و صفوف عرضه و ترفيه/
لباسة المجند لها اليوم قومه/
اتراثنا و اتراث اهل نجد نحييه/
و من لامنا في اتراث اهلنا نلومه/
اميرنا معنا عسى الله يحييه/
ابو سعد وجه السعد في يمومه/
ميزان حق و فرض ربه مصليه/
و لا مضى ثلثين ليله يقومه/
عسى السحاب اليا نشى من مناشيه/
لا صار فوق تمير تمطر غيومه/
يغيث ريضانه و يكتظ واديه/
و يسقي النخيل اللي عليه مهيومه/
هذا مجزّلنا نحبه و نغليه/
حبٍّ مبنّي في الضماير رجومه/
من عهده الاول اليا عهد تاليه/
ما اخلف مراسيمه و لا اخلف سلومه/
بدو و حضر متفرقين بنواحيه/
للحق حق و للخصومه خصومه/
هذا الزمان اللي على الله مشاكيه/
زادت غرابيله و كثرت همومه/
يا قلّ حسناته و ما اكثر مساويه/
وقتٍ على الاسلام ينفث سمومه/
فيه الولد يطمر على اللي مربيه/
و على اقرب الاقراب يعلن هجومه/
سرى بليلٍ موحشاتٍ مساريه/
و الموت في سوق الدواعش يسومه/
عادى بلاده و المشايخ و اهاليه/
و انكر ولاة امره و سبّ الحكومه/
يقول ابي الجنه و غيره مقدّيه/
عمامةٍ سودا عليه محزومه/
ابوه يبحث عنه و الام ترجيه/
هذا العقوق اللي تجينا علومه/
يفجّر حزامه و يذبح بني خيه/
حتى بيوت الله غزتها سهومه/
اكبر خطا و اعظم بلا وش دواعيه/
الدين قايم و البلاد محكومه/
خوارجٍ من سابق الوقت ماضيه/
على علي قاموا بسيف الخصومه/
اصغار سنّ و دينها ما تراعيه/
سفه العقول و ليلها ما تنومه/
يقول بنطهّر وطنكم و نلغيه/
ينام ثم يملي علينا حلومه/
اهبوا هبيتوا يا الوجيه المكاريه/
و اخسوا خسيتوا يا الكلاب مخزومه/
و الله ما يدنس وطنا و اراضيه/
و الحال منا ما تردت عزومه/
حنا مقابيسه و حنا حواميه/
حنا مداغيشه و حنا قرومه/
و حنا ليا منا دعانا نلبيه/
و نسقيه ثراه و نصطفق في حزومه/
في ظل من يحكم وطنا و يبنيه/
امامنا منه الامور محسومه/
سلمان بن عبدالعزيز الرجا فيه/
بعد العظيم اللي علينا عمومه/
هو درعنا الضافي عسى الله يخليه/
ملاذ عن برد الزمان و سمومه/
لا قال يا عيالي و نادى مناديه/
قمنا ليا قمنا على القوم قومه/
جن الحروب اللي تردد عزاويه/
يرعد سمانا ما تهاوى نجومه/
انشد اهل صنعا و للعلم طاريه/
وش فعلنا يوم الديار مهلومه/
قمنا على الحوثي و صالح نقاضيه/
يوم الخبيث اعلن علينا هجومه/
من ينكر المعروف حنا نجازيه/
و من خاننا حنا دواه و لهومه/
هذا جزانا يا مضيّع هقاويه/
تعد نفسك صقر و الا انت بومه/
ابو فهد بالك تقرّب حواليه/
جعل حياتك كل ابوها معدومه/
على عميل ايران بانت مواريه/
انا اشهد انه ساس حكم و حكومه/
يا علنّي ما اعدم وجوده و لا ابكيه/
و يا عل يوم المعتدي قبل يومه/
صح لسان شاعرنا فهد المفرج
-
2015-07-19, 11:33 PM
قصيدة لشاعر البراري فهد المفرج في حفل عيد الفطر 1436 هجري
العرض العادي
