جعل المزون اللي علينا محادير

[منصور المناع]

يالله يالوالي عليك التدابير = يالرازق الخلاق وأمرك مطاعي

بامرك وتيسيرك تسير المقادير = ومن خالف أمرك ما بها شك ضاعي

جعل المزون اللي علينا محادير = يسيل من همالها كل قاعي

والروض يسقي الروض من وابل الخير = عند الولي لا من ضاقت وساعي

حتى العشوب تزوف والأرض تخضير = لا شافها قلب به احساس تاعي

الخير مقبل فالليال المناحير = الوسم طاح وباذر العشب فاعي

يازين شوف السيل عقب المعاصير = عقب الدهور تزين كل المراعي

حتى عطايا الله بكار ومعاشير = لا من ضواها الليل تمسي شباعي

والبدو ما يشرون برسيم وشعير = ما عادله في برحة السوق داعي

وكل يقول الحمد لله انا بخير = ما به خسارة غير مصروف راعي

ويخيمو الناس وقت المضاهير = كل على المطلاع صابه ولاعي

وتشوف لا شرفت فالعالي عصير = بيت الشعر وتشوف كمن شراعي

وفالبيت قرم لا لفوه المسايير = يذبح من خيار الذبايح رباعي

وحليب خلفات هجال ومصاغير = ودله مسويها طويل الذراعي

فلة حجاج مع رجال مناعير = وسوالف يصغالها بالسماعي

تبعد عن القلب الحزين التفاكير = ويرقد مهوب يسامر الليل واعي

حب البداوه وسط قلبي وانا صغير = الله خلقني فالحياة اجتماعي


الشاعر : شافي بن مطلق آل شطيط