[سحاب شقراء]

السلام عليكم ورحمه الله وبركاته

يالله تحييهم وتبييهم وتخليهم لعين ترجيهم
يالله حي الغالين كلكم صغيركم وكبيركم وذكركم ونثاكم وليا حيا كثر وليا كثر تنثر وليا تنثر تزبر
ترا هذا كلام العجيزات منول جعل ربي يسكنهن الفردوس الاعلى من الجنه امين يارب العالمين حيهن وميتهن
تراهن هن سعاده الدنيا يالغالين والي عنده احد والديه شوري عليك بر فيهم اذا تبي رضا ربك سبحانه

قديم اذكر الطلاب اذا جت الاختبارات كل واحد معه دوسيه
كان تذكرونهن اللي فيها قضاب من فوق ويجن ملونات حمر وصفر وخضر وفيه مكان يدخل القلم المرسم او البنسل وفيه مكان للمسطره وحاطين

في الدوسيه فروخه تدرون وش الفروخه الورق المسطرمهوب كفوف لايصير مخطط

نسميه فروخه مسطره او مخططه واذا سلموا الشهادات ياكثر الدواوير الحمر عند بعض الناس والدواره الحمراء

يعني راسب في ماده وعد واغلط من الدواوير الحمر اجل يقول المدرس لواحد في ثالث

ابتدائي وكانوا يختبرون ماده العلوم شفوي يقول له المدرس كم قرون البقره ويجلس الولد

يحمر وجهه ويصفر مايدري والله العظيم المدرس يشر له بصبعين يعني قرنين والولد يقول

اربعه قرون قال المدرس رح ناجح وش اسوي به عجزت افهمه ههههههههههههه


امنول نرقد في ايام الصيف في الطايه او السطح واذكر امي جعلها في عليين وابوي وكل مسلم

اذكر امي اذا جاء مسيان يعني حول المغرب تقول لي تكفى ياوليدي ارق للطايه وافرش المراقد نصير قد تعشينا

وانا اقول ان شاء الله ياامي شوفوا المؤدب شوفوا الولد السنع يقول لامه ان شاءلله ههههههه

وتراي منول هوووويدي اذكر اهلي يدوروني في البيت مالي حس هههههههه المهم ارقا وافرش البسط (جمع بساط) واصف المراقد عليها واحط الشراشف فوق المراقد ذيك اللي فيها ورد احمر وخضر

واصفر اللي يجن مشجرات
اصلا مانشوف الورد الا في الشراشف والوسايد والا في الطبيعه نحسب مافيه شي اسمه ورد ماعمرنا شفناه
المهم والله يعين على المهم احط الوسايد الله ياذيك الوسايد اللي مكتوب عليها صباح الخير تذكرونها ثمن احط البطانيات اللي في اطرافهن هدب يعني خيوط

نسميهن هدب من فوق وتحت والاجناب مافيهن شي ذوليك اللي مقلمات يعني فيهن خطوط

نسميهن مقلمات (شده على ل) ثم قبل ما يرقون بشوي اركض واتسدح على المراقد كلها

اقول ابي اخذ برادها هذي علامه حب الذات ههههههههههه

ثم ترقا امي جعلها في الجنه وكل مسلم معها ذيك السحله المعدن ماليتها مويه وتغطيها

بشيله عن اللواحيس كلش منول يدبي والسحله للي يبي يشرب كلنا نشرب منها عادي

مهوب مثل هلحين البنت ماتشرب عقب ابوها لان بعد المغرب محد يجلس تحت يصير يخوف
منول في بيوت الطين وحشه مهوب يعني وحش لا تعني كلمه وحشه الخوف من الظلماء ولا فيه كهرب مانعرفه

وبالضبط حنا والدجاج نومتنا وحده هههههههههه ونتعشى عقب العصر يعني مسيان والا رقدنا

في السطح وصارت ايام هجرة الطيور نشوفهن يطيرن فوق (اكيد انهن يبي يطيرن فوق اجل

تحت ههههههه)
وطول الليل وهن يقولن واق واق واق وسبحان الله العظيم يطيرن على شكل راس سهم او رقم 7 بالعربي تذكرونها يالعويد الي مثلي ونشوفهن على نور القمر ويصير احيانا فيه غيم وتعال شف تشكيلات السحب مع القمرا مره يطلع الغيم على شكل اوادم

ومره على شكل غنم على طبيعتنا بس لو يجي اشكال غير الغنم والبقر والبعارين ماعرفناهن

تصدقون اذكر يومي بيبي يعني صغير قد قعت اصيح صياح تدرون ليش طلع شكل الغيم كنه

خروف السله ولا عمرنا شفنا خروف السله بس يخوفونا اهلنا منول علشان ما نروح للقلبان

ونطيح فيه واذكر امي كانت تلبسني كرته حقت البنات مدري شاكين فيني والا انها كانت تحلم

ببنت وطلعت انا والله العظيم اني صادق ذيك الكرته الي مزموومه تحت الصدر وتذكرون

ذيك المناديل القماش اللي يشبكونها بمشبك في كتف الواحد والقحفيه اللي تحط على الراس و تربط تحت الرقبه

يعني تحت الحنوك طبعا فنايل ماكو صراويل ماكو
لا تحسبونها ماركه ماكو لا يعني مافيه فنايل ولا صراويل بس كرته لي والعيال الثانين مقطع ومنول فيه لعبه للبنات والعيال الصغيرين
يقولون حدارج يابدارج ان كل شيخن دارج حب يدك يا مقص قبل يحبها بليس ثم كلن يحب يده والاخير يطلع برا
واللعبه الثانيه اللي يلعبونها البزور هي اللي يقولون فيها

حقرا بقرا قلي ربي عدي العشره ونعد من واحد الى عشره واللي تجي عليه العشره يطلع برا

ومن الاناشيد الخالده هي ارنب نط جاب لي خط من يقراه انا اقراه سبع سنين ما انساه

والانشوده الثانيه ريري ريري رته متا يجي بابا يجي الساعه سته راكب والا ماشي راكب بسكالته حمراء والا بيضاء بيضاء زي القشطه
ترانا مانعرف وش معنا بابا ولا بسكلته منول نسمي ابوانا يبه بس
ومن الاناشيد الخالده
ابي اشترى لي ساعتن فلم انم من الفرح في الليل تمشي والنهار ولم تقف او تسترح

ومن القصص البريئه اتى الثعلبو الى الشجره ورءا الغرابو معهو قطعة جبن وقال يا غرابو

قال الغرابو هاه قال اعطني قطعه جبن من ذا اللي معك وعيا الغرابو وقال الثعلبو المكارو ان

صوتوكا جميل ايها الغرابو ففرح الغرابو لقول الثعلبو المكارو ونعقا الغرابو فسقطت قطعة الجبني فااكلها الثعلبو المكارو
تبونا بعد نطلع شعب منتج هههههههههههههههه زين ندل بيوتنا هههههههههههه

فينا منول صح مدري وشو ذاك