جيتكم بشكي وحالـي فيـه حـال
قصّتي قِصّه وطرفـي مـا يبـات
قبل مدّه رحت في سوق الشمـال
ودّي اشري لي شماغ ومرفقـات
يوم جيت السوق شفت احلى غزال
واقفٍ بيـن الجمـوع الناطـرات
اشّر بطرفه وقـال اقـرب تعـال
قلـت يالله طالـبٍ منـك الثبـات
لابـسٍ برقـع وبجفونـه ظـلال
في عيونه سحر وبرمشـه سمـاة
حاجبينـه مثـل تقويـس الهـلال
وجنتينـه حمـر توهـن يافعـات
ناظر بعينـه يميـنٍ فـي شمـال
قال هات الرقم سرعه هات هـات
قلت هاك الرقم يا سيـد الجمـال
واحذر عيـونٍ تناظـر حاسـدات
ثـمّ قفـى والنظـر يمّـه تـوال
واثق الخطـوه ومشـدود العبـاة
احتريت ايّام مـا جانـي اتصـال
طال صبري والهواجس حاضرات
صرت احسّب إحتمـال وإحتمـال
ضاع منه الرقم والاّ الزين مـات
اتصل فيني عقـب شهـرٍ وقـال
انت خالد قلت هاتي لي الصفـات
قال شفتك قبل فتره فـي الشمـال
مير ظرفـي ماسمحلـي والحيـاة
قلـت حـيّ الله حبّـاس الـدلال
ياهلا والفيـن مرحـب ياغنـات
قلت شسمـك يامذوّقنـي الهـوال
ردّ لي بضحكه وقال اسمي نجـاة
قلت اشوفك؟ قال لا هـذا محـال
خلّ عندك صبر وابشـر بالعطـاة
قلت نصبر دام فالصبـر اعتـدال
ودّي بشوفـة عيـونٍ ساحـرات
واستمر الصبـر لشهـورٍ طـوال
والوصوف الّي تجيني مدهشـات
قال زيني مـا تلاقـي لـه مثـال
لو تلف الأرض مـا مثلـي فتـاة
زاد فيني الشوق واكثرت السـؤال
والنظر محروم وش هذي السـواة
ثمّ جا الموعد عقب طول احتمـال
من ثلاث سنين واحلامـي شتـات
يوم شفته صابنـي مثـل الهبـال
لا خـدود ولا جمـال ولا شفـاة
انصدمـت وقلـت يالله فالحـلال
قبل لا تغـدي بنـا الدنيـا فتـات
اثـر هالبرقـع عـذابٍ يارجـال
زيّـن الشينـه وحنـا فـي غنـاة
خلّوا المستور والّـي فـي كمـال
وبطلوا لبس البراقـع يـا بنـات