يمه ترا فرقاك ماهي بسيطه
من بعدكم ذقت الهموم السلايط
أي والله أن الفكر زاد اتخبيطه
حيران يايمه ونومي غطايط
الزلفي في عيني تضايق محيطه
كني طريحٍ ذاق ضرب السوايط
من فوق ضلع اطويق صوتي أعيطه
ونّات قلبي شبه موس الشلايط
نفسي حزينة والمواجع شطيطه
حد الرماح ابوسط جوفي لاعايط
بيتك بعد فرقاك ظلمة تحيطه
والحزن وشّح كل ركنٍ وحايط
يمه حياتي دون شوفك وريطه
كني يتيمٍ طول وقته يعايط
قربك دوا يبري الهموم الغويطه
تسوين من يسكن جميع البسايط
بوسة قدمكم كل جرح*ٍ تخيطه
وكل الحواس الخمس عندك ربايط
انتي الحنان اللي زهورك يحيطه
وانتي الدفا لازاد برد الشبايط
نفسي لبرك يا بعدهم نشيطه
ويضا الخوافي كلبوهن نشايط
دامك معي تبقى حياتي ضبيطه
ومجملة يمه بحلو الشرايط
عنك الأذى يمه بيدّي أميطه
وحبك سكن قلبي بليا وسايط
يازين ماضيكم ونغمة شريطه
فيه العلوم الطيّبات اللقايط