[أبوهليبه]

السلام عليكم ورحمة الله وبركاته ،،،،

الله يمسيكم بالخير والمسرة جميع ،،،،

عاد بصراااحة اليوم نبي نطلع عن جو الشعر البحت والاحاسيس اللي تتعبنا

احيان رغم عشقنا لها ،،،

وقلت لازم اجيب لكم مادة ترويحية وممتعة نسج معها شوي

ونستانس ونتعرف على لغات وتصرفات مخلوقات تعيش معنا في المعمورة 0

لكن من عالم ثاني ،، بمعنى ان هالقصة ماحصلت على الأوادم ابد ،،،،

هالقصة حاصلة ٍ على ( سلوقي ) ؟؟؟؟ ( وارنب ) وسالفتها سالفة ،،،،

طبعاً سبب حفظ هالسالفة هو القصيد الخاص بها لأن القصيد يخلد الفعل المجيد ،،،

وهالحين ابا اسمي واقول وعمر المتابعين يطول ،،،

كان في طراف الحرة الواقعة جنوب ( مدركة ) بمنطقة مكة ضلع يسمى بـ ( اليديم )

ومقابل لهالضلع قاع يسمى بقاع ( الشيقة ) والقاع بعرفة للي مايعرفة ،،،،، !

( هو موقع في الحرة خالي من الأحجار والأشجار ،،، ؟ والشوف يصير فيه مايعتاز ،،،

ويزين فيه طرد الأرانب والضبا للقنوص ،،،،، )

المهم كان فيه سلوقي صيد مدرب ينقش الحب من الأرض وهو طاير من زين طبعه

ضيعوه هله بالحرة ،، واخذ من ضلع اليديم مسكن له وبرج مراقبة في نفس الوقت

كل ماشاف في القاع ارنب ولا جربوع ولا ضبي صغير غار عليه وسنعه ،،،

المهم كان في الحرة ارنب تنزل القاع وتاكل من هالحرفرف والنقيع والحوّا

والأذخر والشكاعي يعني فالتها ،، واذا شبعت راحت (( للحرجة )) ،،،، !!!!!!!!!

( والحرجة بتسكين الحاء هي مجوعة اشجار متداخلة في بعضها البعض بشكل كثيف جدا

من السمر والكتاد والعراد والسلم وغيرها وصعب جداً تجاوزها او طمرها !!!!! )

المهم كل ماجاء هالسلوقي يبي ياطا على رقبتها زبنت الحرجة وخلته يروح في لهمها

ومايقدر يصيدها وهوحريص بالحيل على صيدها يحاول يجي من يم الحرجة

عشان يحدها على القاع ويزين طردها ويلعب عليها مثل مايسوي في غيرها كل يوم مير

ماهنا فايدة كل ماطردها رجع للضلع وجنوبة مليانة شوك ومتجرحة ودمه يصب ( خبل !! )

وفي ليلة من الليالي والبدر تام ( زهيري باللغة البدوية ) جاك هالسلوقي من يم الحرجة

يبي يروح للضلع وهو يناظر في القاع ولا هالشوفة اللي وده ابها من زمان

لقى صاحبته الأرنب تلعب في القاع لحالها والجو صافي والقمر تام يعني جاك ،،،،، ماتمنى ،،،،

قام وتقدم خطوة وحدة وسماها اول خطوات النصر الليلة وهو يتمغغغغغغط لين طقطقت ضلوعة هههه

وقال بصوت عالي جدا ً من يفكك مني الليلة يا ،،،،، متعبتني ،،،

ويوم شافته شهقت عزي عنها والله ،،، ماصدقت حاولت وحاولت وحاولت ،،،،

بس مامن فايدة ،،، والسلوقي رجل على رجل ويضحك مبسوط حيل

المهم قال لها شوفي يا ،،،،، خبلة انتي ميته ميته مافيها حكي

وانا بها المناسبة السعيدة راح اصوت لكل الحيوانات اللي جنبنا

عشان يحضرون مراسم قتلك فاهمه ولا ،،،، لا ،، بصوت عالي طبعاً

المهم من قرادة حظ هالسلوقي جو كل الحيوانات للقاع ومن بينهم الذيب والنمر

لحفظ الامن اثناء تنفيذ القتل ،،،

وقال السلوقي اسمعوا يالحاضرين واشهدوا اني قبل ما اقتل الأرنب ابا احدّي

يعني بيعرض ويغني ويرقص رقصة الحرب والنصر على راسها

واذا ردت عليه واخصمتني تراها طلق بمعنى ( اطلق سراحها ،، واعفي عنها ،،،، )

المهم انبسطت الأرنب لأن السلوقي يعرف كل شي عنها وعن حياتها بس المسكين

مايدري انها شاعرة من الطراز الأول ،،،

واستغلت الارنب الوضع وشهدت عليه كل الحاظرين ،،،،

وطلبت من الذيب يكفل السلوقي والنمر يحطها في لحيته ان غدربها السلوقي 00

واعطوها طلبها ( اكيد ذيب ونمر وش بعد تبي اكثر من كذا تحمد ربها )

وقال السلوقي : على لون الحداء ،،،

ســــلام للـي متعـبـتـنـي فــي زمانـــي وتغـبـنــي

لا حكت الكرعان وارخت بالأذاني خـــــوف مني

واليوم عقب مشاهدك جاك الخطــــر منا ومنــي

القاع صفصف والدروب مسكـرة والمـــوت دني

والحفل مشهود وعسى من غاب مرسوله يهني

ياما حــلا بعـض الصـدف تغنيك عن كل التمنـي

طاح الرشا بمقيط جوف الشعب والمرقا صعيب


طبعاً المعنى في بطن الشاعر ،، وصفقولة وأول من صفقلة الحصني لأنه حاقد عليها

وقام الصوت يرتفع والفوضى تعم المكان يبون التنفيذ من السلوقي ،،،،،

وقام النمر والذيب وسـكـّـتوا الكل وقالوا والله ياواحد يفتح فمه انه اللي يموت قبل الأرنب

مفهوم ولا لا ،،،،، بصوت خوفهم بالحيل ،،

وقال النمر والذيب للأرنب يالله ياارنب وش ردك ولا بتموتين هالحين بسرعة عندنا شغل ،،

ماحنا فاضين لك انتي ووجهك ( ماتوقعوا انها بترد !!!! خمتهم خمممم))

قالت الأرنب :

يامرحبــا ترحـيب مايبــدي السفـاط ولا التــونــــي

ترحيبة ٍ تعمـي العيــون الـوايقــة حـيـنـه حــدنـــي

وابنصحك وان طعت شوري يالوذي كب التجنـــي

وارجع وراك وخل عـنـك الغطــرســة لا تمتحنـي

اخير لك من قبل تندم ،، والخـبـر مــردود عنـــي

قلته وانا بنت الخرينيق ،، وعســى حتفــك يدنـي

لا طاحت الصخرة على الصفصاف مافيها طبيـب


طبعاً يوم وصلت الشطر السادس هذا بيت عنصري تعتزي فيه بالقبيلة

( وصاح معها كل الأرانب بحكم القرابة والوبارة بحكم المصاهرة ،، )

وراح فيها السلوقي المسكين وعتقت الأرنب وحلا لاه والله يالشوزن

وسلامتكم جميع ،،، والمعذرة على الأطالة

والقصة والقصيدة لأبو هليبه ،،،

ليست في الكتب او المجلات دمتم كما انتم رائعين احبتي ،،،