[مسك المشاعر]

__

صبحكم /مساكم الله بالخير جميعاً
عجبتني هذي السالفه

سالفتنا عن واحد عمره 22 سنه،، يبي يسافر من مدينة ليلى الى الديره اللي ساكن ابوه فيها والطريق طويل وممتد عبر صحراءنا الغاليه ..




شافه واحد من ربعه عقب صلاة العشاء متولم وبيركب السياره سأله على وين إن شاء الله العزم ؟




قال :لم ديرتنا ان الوالد تعبان وابمر عليه اشوفه ..




قال اللي سأله :أنت مهبول تروح بها الليل ..والخط تراه عقب السيل اللي من اسبوع مهوب زين.. ولو تاقف عليك السياره الله يستر، ولاك لحالك والطريق بعد ما يمدحونه لي ربع توهم جايين ويقولون ان الدرب بالليل كله سكن (جن)وتراي سمعت من كذا واحد!!




الرجال قال غريبه صح اول مره اروح بالليل بس ما قد سمعت شي !! قال الثاني لا وانا اخوك انتبه ياما راحو ناس ،، يقول واحد من ربعي انه شاف ....ألخ




وقعد من سالفه لسالفه وكلها يقول فلان ،،وفلان صار معه ،،لين انتلى رفيقنا وقال يابن الحلال ..سم بالله واقرا الورد ودعاء السفر واتكل على الله ..قال خويه بكيفك انا نصحتك ..




مشا رفيقنا عقب ماتحصن باسم رب العالمين وكل الخط وهو يهوجس بكلام رفيقه ..ويوم قطع من الطريق ثلاثة ارباعه تعطلت السياره .. حاول يصلح السياره مافيه فايده ..ابطى وهو ومتعطل مامر عليه احد من المسافرين ،، ويييييين ويلمح ضحاح من بعيد ،وشويات ويقبل لوري مرسيدس او مرسيدس لوري (مادري وشلون يسمي) المهم وقف راعي اللوري وفتح باب السياره اللي من جهة الراكب ،قال رفيقنا:السياره تعطلت واخبر ان فيه محطه عقب 13 كيلو الله يجزاك خير لو توصلن معك؟؟




أشر بيده السواق يعني اركب وما حكى ولا كلمه ولين العيون حمر مثل الكبريت؟؟؟؟؟؟؟؟؟؟؟




ركب الرجال وهو يهوجس بالعيون الحمر ورفيقه ابو السواليف..




قعد يسولف يبي يوخر الهواجيس ومن سالفه لسالفه والسواق بس يلتفت عليه يناظره بعيونه همن يناظر للخط سأله انت ماتحكي يعني اطرم ؟؟مارد عليه السواق !! اسكت وقال بنفسه شكل الكلام صدق والله العالم اني طبيت ..وكان باقي حول 300متر على المحطه ..




صارت الغماره مع سكوتهم اثنينهم هدووووووء ولا يسمع إلا وش المكينه حقت السياره والهواء مع القزاز يصفر وشوي يوم قال شي قربع قربع قربع ويفتح رفيقنا باب اللوري من غير وعيه وعلى بره ..طب من السياره !!!وقف سواق اللوري ..ورفيقنا حط النعال (وانتم بكرامه) حدر اباطه وركض :




طب طب طب طب وبسم الله بسم الله طب طب طب طب




بسم الله بسم الله




الين وصل المحطه واللي زاده خوف ان السواق بتل بمكانه ما مشى ..




ويوم وصل المحطه ولا الانفاس منقطعه ويشوفه موظف بالمحطه ويسأله وشبك بسم الله عليك ويعطيه ماء ويوم ركد قال: انه ركب مع لوري والظاهر انه جني!! وقال ان عيونه حمر ولا يتكلم بس يناظرن ويوم طبيت وقف ولا عاد مشى ولا هوب وراي..قاله الرجال انت غلطان وشلون تركب وبس كان يوم شفت وجهه مارحت معه!!




وشوي يوم اقبل اللوري ويشر بيده قال هذاه الجني..




قال الرجال اللي بالمحطه: هذا فلان ،هندي، يلبس سعودي ولا حاكاك لأنه ما يعرف ولا كلمه عربي و يسوق 18ساعه ..




وقف السواق وسئله بالأشاره الرجال اللي بالمحطه.. وراك وقفت يوم الرجال طب من السياره وما لحقته ؟؟ أشر الهندي بأيده أن الشراع انفك ووقف يربطه عشان ما يتشقق ..ضحك رفيقنا وقال للرجال اللي بالمحطه والله اني تخوبلت وقلت بس جت القبيله كله..ألحق عمرك يافلان.. ولا وعيت إلا وأنا أركض ..