بسم الله الرحمن الرحيم
قصيدتان لي احببت مشاركتكم فيها..اتمنى منكم التعليق عليها..
القصيدة الاولى عنوانها (ذيب آجا)..
هالذيب له قصة معي في احد الايام انا واثنين من الشباب كانت لنا استراحة برية غرب حائل سمعنا عوا ذيب صوب الضلع ويوم جيناه لقيناه صويب طبعا ماقدرنا نمسكه زبن الضلع..راحت الايام
وشفت الذيب نفسه في محطة على الخط السريع مسجون بله شبك..المحطة من عادتها انها تضع في هذا الشبك كل شهر حيوان حتى يجذبون الناس لها..فحز في نفسي وشبهته بحالتي .. كلمة (تشاهيه) اعني بها الهندي الذي يعمل بالمحطة..
ملاحظة ان اغنيها على موال ياطير ياطيرالسعد المعروفه اقول..
ياذيب ياذيب آجا يلي عويت الصبح صوتك غريب
مدري حداك الزمن ياذيب والا حالتك مالها
لا الصوت صوتك ولا ترهب من العالم بعيد وقريب
راحت عليك الليالي الماضيه ياذيب وايامها
الله واكبر زمانن فايتن ياذيب تقنيب قنيب
ياكم من ليلتن اسمن حلال ذيك العرب شالها
واليوم مسجون وهلت دمعتي والله شي عجيب
من يوم شفته ابضل الشبك وتشاهيه سجانها
حسبي على هالزمان اللي غدا الذيب ماهو بذيب
وش عاد به نرتجي الحصني يدير الحرب وشجعانها
ياذيب حالي مثل حالك غدا بالحال ذاك الحبيب
اللي لشوفه نشيل السامري ونعيد بالحانها
ياويل حالي عقب فرقاه ماضنيت حالي تطيب
مدام داف الحشا حبه ملك قلبي وغنالها
اصبحت عقبه مثل مثل الذي وقع ابوسط القليب
ولا حوله اللي يرد الصوت من شيخان عربانها
ولا بعد من وطاه الوقت وصار بديار قومن غريب
خلوه ربعه وراحو اتحوم عليه الصبح غربانها
وامسى لحاله وحاله ماتسر بعيد ولاقريب
يصفق شماله بيمينه ياولد في وسط جيانها
في جمرت القيض لو شافه صغير السن خطرن يشيب
من عقب عزه سفيهن بالعرب تنجشه ورعانها
طلب استغاثة
يالله ياعالي على كل عالي
ياواحدن ماغيره الخلق ترجية
يارازق الحيه بسمر الجبالي
واللي دبا بالقاع من القاع تسقيه
يامحيين عودن هشيم وبالي
ينبت ورق من بعد موته وتحيه
يالله طلبتك ياعظيم الجلالي
تنزل علينا الغيث والمزن تنشيه
وتسقي جنوب المملكة والشمالي
وشرقه وغربه وكل وادي اتمشيه
ويرعى الحيا بالارض حمر الجمالي
مع الغنم والروض يطرب مراعيه
ويطيب كيف اللي نجره يلالي
ويفرحبه اللي اسود الحزن يكويه