تعالي نسكت أحسن مـن كـلامٍ تاليتـه جـروح
هلا بالصمت دام الصمت ما يجرح مشاعرنـا
أنا وانتي وطول الصمت والدمعة وكثر البوح
ولـيـلٍ مــا بـقـى بــه حـيـل ينهـانـا ويامـرنـا
بكى ما كنـه اللـي كـان يغرينـا فـرح ومـزوح
سكـت مـا كنـه اللـي كـان ملهمنـا وشاعـرنـا
توحّي تسمعين الليل ما أدري وش بلاه ينوح
علـى ضحكاتنـا والا علـى كـسـرة خواطـرنـا
إذا يبكـي مـن الفرحـة علينـا علّمـيـه يــروح
وإذا يبكـي حـزن تكفيـن قولـي لـه يسامـرنـا
ويجبر خاطرٍ قامـت هواجيسـه تجـي وتـروح
يشـوف الحـال ويكـفّ السـؤال اللـي محيّرنـا
صحيح إنا صبرنا واعتبرنا صبرنـا مصلـوح
ولكـن مــا بـقـى شــيٍ عـقـب هــذا يصبّـرنـا
دخيل العاتق اللي له ورى ليل الجديلة ضـوح
وفـي جــاه الشـفـاه الـلـي بنسمتـهـا تعطّـرنـا
وفي وجه العيون اللي بقى للدمـع فيهـا روح
لأجــل خـاطـر لياليـنـا وماضيـنـا وحـاضـرنـا