غير صالح للنشر 1
 

أبفتح للجدال أبيات شعري وادفن المقود
لعل اللي فطين يصيد من لوله ومرجانه
.
أبضرب في البحر شرقه وبضرب ف الجبال أجنوب
وبعرج على نون الحياء في البيت وأركانه
.
بفك اللي تشربك من حبالي واعقد الملفوت
وحط الشعر في كفه وأحط العقل ف وزانه
.
ابلغي قاعدة كنا وابشرح قاعدة بنكون
لعل الشيخ يشبع من بقايا خير بستانه
.
تعب يزرع سنينه حب في رجوى المزون تجود
تعب وإحنا تعبنا والأمل مقفول بيبانه
.
تعبنا نسمع أرعود( ن) مطرها مايبل عروق
يطيح الحلم قبل العلم ما تحمله سيقانه
.
تعبنا نبني القلعه عرق ونعيش خلف السور
يباسا أحلوقنا والماء تسابق فيه وديانه
.
نكابر يا وفانا بس من وين الدمانا عروق
نزف دم الكرامه في زمن بخست به أثمانه
.
نردد يا صبر هانت بعد ليل الظلام اشروق
ويردد صبرنا يا كم سمعت أوعود رنانه
.
حولينا الفيافي مربعه وأيامها في ديم
وحنا يوم واحد كيف يحيي أغصون ذبلانه
.
يحثون الخظأ نحو النجاح ومشينا بالكود
عيون مفتحه وعيون فيها النوم نعسانه
.
نحاول نرفع الهامه وتخنقنا يدين سنين
نحاول بس مامن حيل والاحوال تعبانه
.
بدا فينا التعب ياحذ نصيبه والعزوم تخور
نقاوم يازمن طاري الربيع ودعوة أعوانه
.
عشان ارقابنا تحمل لحكمك يازمنا اعهود
دخيلك لاتخلي العقل يتبع فكر شيطانه
.
تذكر يوم كنا يازمن في المعركه وافين
خذيناها غصب والقصر دان بكل سكانه
.
تذكر مايعيش القلب لوجاع بحماه ضلوع
مدام الجسم واحد يازمن نحيا على شانه

الشطر الثاني من البيت الاول فيه خطأ
وادفن المقصود

تذكر يوم كنا يازمن في المعركه وافين
خذيناها غصب والقصر دان بكل سكانه

في معركة محمود..صح لسانك عز الله انها غير صالحه للنشر بطريقة اخرى رائع جداا اخوي خالد اشوى ماتعمقت بالحيل..

غرقت بين أسطر تلك المجنونه ..

لي عوده إلى القصيده .. أحاول فك تلك الطلاسم اللتي تحتاج إلى التغلغل في الأعماق لاستخراج ما تخفيه السطور .. ظل القصيده ..
تحيتي لقلمك الرائع يا أبا الوليد ..

صح السانك هذي فزوره ما يعرفها غير شاعرها