شبكة البراري

شبكة البراري (https://www.albrari.com/vb/index.php)
-   واحة شعراء البراري ( قصائد، خواطر، نثر) (https://www.albrari.com/vb/forumdisplay.php?f=129)
-   -   @@ (( تعال واقراء عجب العجاب في حوارات العشق من وسط المجتمع البدوي )) @@ (https://www.albrari.com/vb/showthread.php?t=74914)

أبوهليبه 2012-08-30 01:32 PM

@@ (( تعال واقراء عجب العجاب في حوارات العشق من وسط المجتمع البدوي )) @@
 
السلام عليكم ورحمة الله وبركاته ،،،

مساء الخير والمسرة للجميع ،،،

وشلونكم يالربع عساكم بخير وصحة هلا وغلا فيكم والله ،،،

عاد بصراحة تااااااامة اليوم انا جايب لكم قصة وقصيدة ولكن خلوني مع هالتعليق البسيط 0

عادة ً ماتكون القصص التي توثق بقصائدها الخاصة فيها تكون قصص اقرب للصحة واجدر بالثقة والتصديق

والعهدة على الرواة يالربع لأن هالقصة بصراحة من نوادر قصص المجالس ودرة من درر الموااااااقف التي

تتحلا بها مجالسنا الادبية بغض النظر عن ما اذا كانت عفوية وبطبيعتها فنحن العرب عامة والبدو خاااااااصة

ترتكز مجالسنا وتـُعمرعلى سرد القصص والابداع في هل القصيد الجميل بأسلوب لايضاهينا فيه احد مما جعل

منا نحن جيلاً بعد جيل متقنين للقصة العفوية وسردها ومتمكنين في سحر الالباب بنقل او بدع القصيــــد الذي

لايخلو من الجمال والروعة (
فنحن كذلك كعرب وبادية ولله الحمد
) هذا ما اردت التعليق عليه وايضاحه 0

وهالحين ابداء معكم وبكم ولكم سرد القصة وليت الرضاء والقبول0

بداية القصة كان به رجال من الرياجيل اللي قدر الله عليهم وابتلاهم بالدم يعني ((
مدمي
)) الله يدفع البلا

المهم هالرجال جلا من ديرته وقام يحط ويشيل في زهابة بين هالقبايل وعيال الحمايل كل ماجاء لديرة جلس

بها يوم والا يومين اسبوع بالكثير ويرحل كان خايف من اغرامه ولا يبي يبلا معازيبه بالدخاله بمعنى انه مايبي

يكون دخيل ويبلا الناس في حمايته وفضل انه يقضي باقي عمره عبري (
دايم السفر
) وكان يمتاز بقوة شاعريته

وجزالة بيوته لدرجة انه كل ماجاء لقبيلة يسمع مع الناس شي من قصيدة وهم مايعرفونه مير قصيدة كنه قطعة منهم

المهم جاء يوم من الايام ومر على قبيلة معروفة بنفوذها وقوة جيشها وكثرة فرسانها وعظيم هيبتها وسط القبايل

وحل عليهم ضيف هو ومطيته ورحبوا فيه ودلوه على بيت الشيخ وقلط يم البيت وقابل الشيخ واسفهل وانبسط ونسى همه

من كثر طيب النبا والتراحيب ،،، وجات السوالف والعلوم ولفت انتباههم وسحر عقولهم بقصيدة وسوالفه وذرابة طبعة وقام

الشيخ ثاني يوم يبي يبني له بيت في حده ويطلب جيرته ومجاوره ومخاواه لكن اخونا ذكر وضعه وحالته وقال للشيخ لابالله

ارفع صدرك عني طال عمرك انا لزوم ارحل ولزومي يحتريني وان شاء الله ان راد الكريم اني لا اعود عليكم بزيارة ثانية

مير اعذرني الله يطول عمرك 0 قبل الشيخ عذره وارخص له يروّح وأمر العبد يملا رحوله زهاب وقهوة واعطاه بندق جديدة

وعقب ماراح من عندهم مر على هاك الدعب (
مكان مليىء بالحطب ويسمى المحطاب
) يبي يقص له مطرق للرحول لأن مطرقه

انكسر وهو لازم يشعب ذلولة لأنه خايف يعتاز شوحها وهي تكون ماتعودت ثم ماتشوحبه لاجوه اغرماه (
يالله دخيلك
)

المهم نوّخ الذول وعقلها وراح يسيّر في الدعب وفجأة شاف هاك البنت وسط الدعب تلم الحطب وقام يناظرها وجلس ورا هاك الهضيدة

(
نوع من انواع العشب وهي بحجم الثمامة واكبر
) والبنت ماهي شايفته وقامت تشمر عن ذرعانها وتحزم وسطها وهلت ذوايبها لأن طرحتها

فكتها وربطتها على بطنها وهو يناظر في هالملكوت والجمال اليوسفي وشاف القربة معلقة والغضارة (
ايناء للشرب
) في جنبها وراح اخذ الخضارة

وخباها لسبب هالحين تعرفونه وربي انه خطير هالرجل (
ههههههههه
) ويوم قضت البنت من لم الحطب وملا عينه منها زيييييييين وتحلا وصايفها

خلاها لين تستوي في حالها وهندامها (
خطير ومحترم الاخ ههههه
) وقام وجاها وسلم عليها وردت السلام 0

وقالت دوك الماء لاهنت اشرب كان وانك ضميان ودوك المعازيب اقلط :

قال اي بالله اني ضميان وسوى ان يده اليسار تعوره وبها وجع تدرون ليه !! (
هالحين تدرون عن حركااات زمان بس والله انها عذرية ونضيفة
)

قامت البنت وجابت القربة ودوّرت الغضارة مالقتها وجابت القربة وقالت سم هاك اشرب هني 0

قال وين الغضارة ماعندتس ماعون اشرب فيه يدي تعورني ماقدر ارفع القربة واشرب 0

قامت البنت وقالت له اجل خلك حدر القربة وانا اصب عليك من فمها واشرب هني ان شاء الله 0

ياسلااااااااااام جاك يامهنا ماتمنا (
عرفتوا هالحين ليه خبا الغضارة وسوى ان يده تعورة ههههه
) كله عشان يبي يشرب من يدها 0

المهم شرب الاجودي وقامت تعزمه البنت للقهوة وهو مايبي قهوة مايبي الا انه يسولف معها ويحاول يصل لقلبها ويطرحها في حبه

وهواه كرجل تحلم به كل بنت (
فارس ،، شاعر ،، كريم ،، شهم
و ،، و ،، الخ ))

وقام وقال يابنت الاجواد انا عندي بيتين وابيك تسمعينها (
لأنها عجلانه وهو يبي يطرح عليها فكرة انها تسولف معه لفترة اطول
)

وقالت اسلم اسلم (
مادرى اخونا انها شاعرة واقوى منه بعد ،، ورط ابو النكبات هههههههه
)

وقام وتنحنح وبلع ريقه وقاااااااااااااال

ياسخيف الذرعان روحي نشيشة

ماتصلح الدله بلا طيب الفــــــــال

من شي يطرا لي ولا هوب عيشة

لكن يصلح لي على بعض الاحوال


وعشان مايكون فيه تأويل زااااايد ونضمن وضوح الصورة تراه كان يبي يسولف ويملا عيونه منها لعل وعسى

ان يبلغ بها الحب مابلغ به وتكون النهاية الطبيعية كما كانت في عصور ٍ مضت الا وهي (
الزواج
) 0

ولكن كانت المفاجأة والصدمة اكبر من أي شعر او أي حرف ربما تأمل وأمل صاحبه وعوّل عليه اشياء كثيرة حيث

كانت الاجابة تخالف هواه وقالت بنت الرجال وحي ماقالت والله 0

ياخوي لاترضى علي الغشيشــــة

اقلط وسم وهاك بالكيف فنجــــال

اهل النخل عيّوا على تمر بيشـــة

واثنين ماخِشروا على زاد رجال


(( يعني انها مخطوبة او متزوجة وجلوسها معه يعني الكارثة والمطمة بعكس ان كانت غير ذلك
))

وقام واعطاها الغضارة وتبسمت من فعلته وعرفت ليه خباها ( يالبى الابتسامة مير ماهنا نصيب شوف عينه حظ غيرة ههههه راح فيها )

وشد على رحولة وقلبه مثل قلب الخلوج يوم اقفى عنها وهي قفت https://www.aghnam.com.sa/vb/images/smilies/u1.gif0

وسلامة تسلمكم من كل شر احبتي ،،،

والقصة والقصيدة من حديث المجالس وتبادل سير اهل البادية 0

تقبلوا تحياتي والقادم اجمل اعدكم بذلك بحول الله وتوفيقه ،،،

(
ابو هليبه )

بندر الجدعاني 2012-08-30 02:27 PM

تسلم يا أبو هليبة

والله قصة جميلة وسياقها وروايتها جميلة كذلك

والنهاية أجمل وأجمل

تسلم

أبوهليبه 2012-08-30 02:39 PM

اقتباس:

المشاركة الأصلية كتبت بواسطة بندر الجدعاني (المشاركة 1791504)
تسلم يا أبو هليبة

والله قصة جميلة وسياقها وروايتها جميلة كذلك

والنهاية أجمل وأجمل

تسلم

مرحبا والله يابندر الله محييك يالقرم ،،،

انت اللي مرورك جميل وتعليقك متعة لاهنت ،،،

مير انتبه للهوى وسهومة لاتتروط مثله ههههه

Al-KHUSHAIBY 2012-08-31 05:44 AM

تسلم يمينك اخي الغالي وشاعر البراري القادم بقوه

سراب 2012-08-31 05:32 PM

قصة شيقة يابو بندر
سلم فكرك وبنانك على ما امتعتنا به
وسوالف مجالس البدو ما في امتع منها
تلقاه ما ينطق السالفة الا متبعها بقصيدة

بس رحمت بطل القصة والله انه مسكين
حتى نسى نفسه يوم شافها ونسى انه مدمي

ماقصرت يابوبندر امتعتنا

ولك اطلق تقييم

أبوهليبه 2012-08-31 10:23 PM

اقتباس:

المشاركة الأصلية كتبت بواسطة Al-KHUSHAIBY (المشاركة 1791936)
تسلم يمينك اخي الغالي وشاعر البراري القادم بقوه

الله يرفع قدرك اخوي راشد ويحفظك من كل شر ،،،

مرورك متعة لحالة ،،،

أبوهليبه 2012-08-31 10:29 PM

اقتباس:

المشاركة الأصلية كتبت بواسطة سراب (المشاركة 1792273)
قصة شيقة يابو بندر
سلم فكرك وبنانك على ما امتعتنا به
وسوالف مجالس البدو ما في امتع منها
تلقاه ما ينطق السالفة الا متبعها بقصيدة

بس رحمت بطل القصة والله انه مسكين
حتى نسى نفسه يوم شافها ونسى انه مدمي

ماقصرت يابوبندر امتعتنا

ولك اطلق تقييم

الله محييك اختي سراب ومشرفتنا الموقرة ،،،

حياة البادية حياة لايضاهيها حياه وربي ،،،

لكن الحضارة تضل نعمة من نعم الله علينا وجب شكرها والاستمتاع بها ،،،

اشكرك جزيل الشكر على حوافزك الثمينة لي ولغيري ،،،

لوحدك مكسب للبراري صدقيني سراب ،،،

وذلك من خلال طريقتك واسلوبك في التعامل معنا هنا كمشرفه ،،،

مشكورة في اول الامر واتلاه سراب ،،،

غانم الضومري 2012-08-31 10:44 PM

طرح رائع للقصة وكأني أتفرج عليها وهي تسقيه الماء .. أكيد أحلى شربه في حياته .. يكفيه تلك الدقائق الدقائق القليلة في وقتها والكثيرة بما دار فيها من غرام يحول دونه الشرف الذي لا يرضى أحد بخدشه ..

شكرا .. ما قصرت .. مبدع أينما كنت ..

تحيتي

أبوهليبه 2012-09-01 01:34 PM

اقتباس:

المشاركة الأصلية كتبت بواسطة غانم الضومري (المشاركة 1792466)
طرح رائع للقصة وكأني أتفرج عليها وهي تسقيه الماء .. أكيد أحلى شربه في حياته .. يكفيه تلك الدقائق الدقائق القليلة في وقتها والكثيرة بما دار فيها من غرام يحول دونه الشرف الذي لا يرضى أحد بخدشه ..

شكرا .. ما قصرت .. مبدع أينما كنت ..

تحيتي

الشرف حصل بمرورك ياغانم الضومري لاهنت ،،،

شكراً لإهتمامك المقدر وحضورك الموقر ،،،


الساعة الآن 01:09 PM

Powered by vBulletin .
جميع الحقوق محفوظة © لشبكة ومنتديات البراري 2010