¨®¨( بسمـ اللـه الرحمنـ الرحيمـ )¨®¨
¨®¨( السـلامـ عليكـم ورحمـة الله وبركاتــه )¨®¨
^
يقول الشاعر :
اللـه لنـا ياللـي نسـى وصـل الاحبـاب ---- تنسـى وحنـا للغــــلا مــــا نسينــــــا
^
^
احب هذ البيت ودايم اردده ليه ؟
ماادري !!
طيب وش دخل الشعر والشعراء؟
الله العالم !!
اجل وس مناسبة ذكر بيت الشعر؟؟
يمكن اني احب ادلع الموضوع شوي واسوي فيها اني راعي ذوق ورومانسي وحساس ومرهف ولست بمتطرف
وادعج غنج فيه الحلا كله على قول عبدالعزيز المنصور
ماعلينا من ابيات الشعر والشعراء والكلام الحلو اللي يقولونه
بس بعض الايام احس ان بيت شعر اقوى من قنبله نوويه ليه ؟؟؟
لان القنبله النووويه ممكن تفجر وتدمر وتنسف وتمسح دوله كامله مجاوره او بعيده ولا يتغير في احساسك شي
بشرط ان تكون الدوله غير اسلاميه
لكن بيت الشعر ممكن لا سدحته على فلان من الناس يجي معك على طول مجاوب او ممكن بيت الشعر يخلي
منك شي وشويات والدليل خوينا راعي الجنادريه الشاعر المبدع خلف بن هذال اللي ابيات شعره خلته فوووق
( يستاهل خلف بن هذال ) وبصراحه دايم اتذكر بيت الشعر اللي قاله :
هاتوا لي الكيف وارهوا لي من الدله ---- البن الاشقر يداوي الراس فنجالـــــــه
ليه اعجبني هذا البيت ؟
ماادري !!
طيب انا راعي قهوه ؟
لا !!
طيب ليه اعجبني ؟؟
يمكن لاني اتعاطف مع كبار السن ولما اشوفهم يطلبون القهوه بااستمرار اتذكر هذا البيت وعلى فكره فيه ناس
كبار سن اعرفهم بعض الايام اذا مسكوا خط ( مسافرين ) وجاءه نوع من الصداع راح يضطر انه ينزل ويضبط
له دلة قهوه يشرب فيها الين يعدل راسه وبعدها يمسك الخط من جديد
^
^
الا على طاري مسكة الخط ( السفر ) والطريق انا هاليومين ناوي اروح للغرابي ( تراه شارع مو بطائر )علشان
ازين انوار موتري لاني بصراحه ناوي اسافر وماشاء الله اللاند كروزر ( مو توم كروز ) انواره شمس في عز
الظهيره و في السفر كثير ماتشاهد من هالسيارات وعلشان كذا لازم اجاكرهم ( اتحداهم ) ولازم اقوي انوار سيارتي
علشان اذا كبست ( كبسة زر ازعجوني فيها القنوات الفضائيه ) اكشح ( اعمي ) اللي قدامي !!
ليه اعميهم ؟؟
ماادري !!
طيب انا احب اضر الناس!!
لا
طيب وش السالفه ؟؟
يمكن لاني من الناس اللي احب اتبع المثل القائل : تغداء فيه قبل لا يتعشى فيك
^
^
وش دخل الغداء والعشاء مع العلم باني مو جايع ولا احس بالجوع ويخسى الجوع على قولهم وياويل من يجوعني
ولو مااضرب بالخمس ماارتاح واحس بصداع ولفه في الراس ولا يهون كاس اللبن اللي يعمي البصر ويخلي الواحد
مثل التايه في الغربه الخمسه عنده مثل السبعه وبصراحه كل هالكلام ماله طعم اذا ماختمته بنوووومه على البطن
تعكس اتجاه الكرش عندك وتخليه ورم في الظهر
^
^
وش دخل الورم والظهر
ماادري
بس يمكن لاني اكره اني اطلع بسيارتي في الظهر لانه من شدة الحر يضيق الخاتم بيدي بعد ما تتورم يدي ولا انسى
الزحمه اللي تخليني اشغل الحاسه السادسه ؟؟
اي حاسه سادسه
اي حاجه ماسه
وش دخل الماسه في الحاسه
انا اقولكم :
الحاجه عندما تكون ماسه لصاحبها ربما تجعله يفقد الحاسه ( حواسه ) يعني لو كنت محتاج دراهم وكلمت واحد
الاخويا وقال لك اوكى انتظرني عند محل الكبده اللي على شارع فلان من الناس تقاطع كذا مع كذا وبعد ماتروح
للموقع ومن كثر حاجتك الماسه للدراهم ومن طول الانتظار راح تفقد الاحساس بااشياء كثيره مثل ازعاج السيارات
الناس اللي تضرب لك بواري وتقول لك وقوفك غلط والناس ونفس الشي راح تفقد شي مهم وهو عدم المباله (الا مبالاه)
والسبب يعود الى ان المرور راح يجي عندك ويقول لك ليه واقف غلط تقول له انتظر واحد ويقول هات رخصتك
واستمارتك وبعدها يقول الحقني تقوم انت وتقول لا لا خذ السياره وراح وامركم بعد المغرب !!
^
^
وش دخل الا مبالاه في الاحساس ؟
ماادري !!
بس يمكن لان الا مبالاه منتشره عندنا هاليومين ولو تروح لمحل بنشر تلاقي كفرات جديده استخدامها لمدة يوم واحد
فقط !! ولو تروح لمحل فستاتين تلاقي فساتين مبلوسه لمدة ساعه واحد فقط !! ولو تروح لمحل جوالات تلاقي جوال
استخدام حشمه يعني اشتراه واستقبل رساله قصيره ومااعجبه شكل الرساله في الجوال وبعدها راح باعه !!
^
^
طيب وش دخل الرساله القصيره ؟
ماادري !!
بس يمكن لان كل رساله قصيره فيها تقصيره يعني ممكن عمك او خالك او جدك لما يدخل العيد بدل ماتروح له تقوم
ترسل له رساله قصيره تقول فيها كل عام وانت بخير وفي هذي الحاله يكون وضعك مقصر لان الناس الكبار ولا كبير
الا الله لهم احترامهم وتقديرهم ولازم تروح لهم وتحب على روسهم وتعايدهم وتبارك لهم
^
^
طيب وش دخل المباركه ؟
ماادري !!
بس يمكن لان الوقت اللي انا اكتب فيه الموضوع الان وقت مباركه كيف ؟؟
الناس ناجحه وفلان من الناس يرسل لي رساله يقول فيها ابشرك نجحت والثاني يقول ابشرك العيال انجحوا وانا على
طول امسك الجوال واقول له مبرووووووووك مبروووووووك النجاح
^
^
طيب وش سالفة موضوعي هذا ووش دخل :
بيت الشعر : الله لنا
وبيت الشعر : الدله
والحاسه
العشاء
والامبالاه
والرساله القصيره
والنجاح
ومبروووك
انا اقولكم :
الله لنا ----> مافيه احد تذكرني
الدله ----> مافيه احد عزمني
الانوار ----> مافيه احتقال فيني
الحاسه ----> مافيه احد حس فيني
العشاء ----> مافيه احد عزمني
الا مبالاه ----> كل يوم اكتب ولا احد اهتم فيني
الرساله القصيره ----> مافيه احد ارسل لي
النجاح ----> مافيه احد هنئني
مبروووك ----> مافيه احد قالها لي
طيب وش انا سويت حتى استاهل هذا كله ؟؟
انا اقولكم
بس قبل كل شي تلفتوا يمين يسار
ناظروا فوق تحت
هاه لقيتوا شي؟؟
اكيد لا ؟؟
هذا خبري فيكم
وسبق اني اكلتها وهذي المره الثانيه اكلها
بس الشكوى لله
ابقولها
وسمني في دقيقي
.
2006-07-15, 08:56 PM
وش رايكم ؟
العرض العادي
