سحاب شقراء -سواليف الاولين ايام بيوت الطين والحياه الطيبه

[سحاب شقراء]

المشاركة الأصلية كتبت بواسطة عابر سبيل

حمد لله ع السلامه يابومشاعل
مرحبا تراااااحيب المطر يالغالي ،،

هلا ومرحبا ومسهلا بالغالي

الله يسلم قلبك من كل شر ويسعدك دنيا ودين
الله يعلي مقدارك ومقامك شرفتني جعل ربي يحفظك

[سحاب شقراء]

ياهلا ومرحبا بالغالين

منول يوم الحيات البسيطه والطاهره ايام بيوت الطين الا اقبل علينا السحاب نروح فوق تله مرتفعه ونجلس نخيل السحاب وكلن يبدي رايه بالي يشوفه وحيان يصيرفيه اختلاف في الراي وكلن يجيب دليله بالراي وهم يلهجون بالتسبيح والاستعفار ويشوفون من ربهم الخيرالعظيم النافع
ولا قالو بكرا يدخل الوسم تمطر في الليل سبحانك ربي

الان احيان كثيره تجي مشاكل ومعارك بسباب اختلاف التوقعات وزعل ومزاعل وكلام ماينقال

سلامات يالغالين وعلى الراس والعين قدركم جميع ونستانس ونسعد برايكم وخبرتكم ونستبشرخير

بس ترا علم السحاب والمطر عند ربه يسوقه سبحانه للي يبي ويصرفه عن الي يبي

والبشريصيبون مره بالراي ويخطون الف مره

يعلم الله ماودي يجي شي بينكم ومواقف تزعلون من بعض فيها ونتم طاهره قلوبكم وسلامتكم

[بقآيآ .. حرف]

صادق والله يالشايب الله على ذيك الايام
أما الآن
أصبح تواصلنا مع بعضنا سلبي لدرجة أنك تخالفني الرأي فأنت عدوي
الله يهدي الجميع ويردهم اليه رداً جميل
كل التحايا

[سحاب شقراء]

الامطار بدت ورحمه ربي عامه الكون سبحانه

وفيه ثنتين خلوهن ولا تقربونهن

الاوله لاتجازفون برواحكم وتقطعون الوادي والسيل في مجراه والاولين يقولون ثلاث الا هاجن انحش وخلهن وفك نفسك منهن ونزع الثقه فيهن مهما كان

1- البعيرالا هاج

2- والسيل في مجراه

3-والعبد الا صاق او زعل

الثانيه ايام الصيف والحر الشديد شل من راسك الكشتات وحب البرخله الين يربع
وش يحدك تدخل الصحاري بمسافات هذا اعتبره انتحار صريح وهلاك

احرصو ونصحو ربعكم عن الاغلاط وتصير نهايه العمر والموت ماحدكم ربكم للتهلكه وما اجبركم احد عليها بالغصب


الله يحفظكم ويخليكم لعيالكم ووالديكم ويبعد عنكم الفقد من غالين وبس هذا الي عندي

[بقآيآ .. حرف]

الله يسعدك يا شايبنا الغالي
وين اللي يقبل النصيحه الآن أذن من طين وأذن من عجين
والله الهادي البشر الحين كلٍ يقول عقلي الكامل
تحياتي لك

[سحاب شقراء]

بسم الله صلى الله على محمد

الابذكرالله تطمئن القلوب لا اله الا الله وحده لا شريك له

يالله تحييهم وليا حيا كثر وتنثر بعد بصغيركم وكبيركم بعد

اقول ابو سيرين ماتدرون عنه تراي فاقده من موووبطي عساه يكون بعافيه امين يارب العالمين

ترا كل شي تلقاله بديل في الدنيا الا امك الله يمتع الحي منهن متاع الصالحين والميت الله يسكنه الفردوس امين يارب العالمين

اذكر مره طحت ونشقت جبهتي ههههههه قولو وتضحك بعد وتروحبي امي للصحيه منول نسمي المستشفى الصحيه
المهم والله يعينا على المهم ويخيط الدكتور الجرح
ويوم جينا من بكرا وتعلق في الدريشه يعني يالتوالي النافذه
وطيح منها وتنشق لحيتي يعني الفك السفلي انشق وتروحبي امي للصحيه والدم يضرب ويجي الدكتور وقال الله مهونتا امس مخيط لك راسك برضو اليوم تجي فيك اصابه تانيه بالمصري دنتا ولد شقي
ويخيط الفك السفلي مكان اللحيه الا كبرت ويوم خاطه ويخلي الخيوط ماقصهن بطول تقريبن شبر او اقل شوي خيطين اثنين يتدودلن ويقول عشان ادبك راح اسيبهم كم يوم ههههههه والله وسواها الدكتور ومي ماخالفت جعلها للجنه ويصيرون البزارين الا شافوني يقولون ابو لحيه ابو لحيه ههههههه وصرت اتوزا عنهم الين صار اخر الاسبوع وروح للصحيه ويقصهن الدكتور وهو يضحك وقالي لو جيت مره تانيه راح اسوي لك لحيه وشوارب والحمد لله مارحت صارت لي درس بس وشذا الدكتور الي يعقد عيال الناس
اصبرو خل اعلمكم بذا السالفه الثانيه علشاني مبطي عنكم
خل اعلمك بسالفتي يومني صغيييرتوي دعنوني
اوجعتني اللوز الي في الحلق لان عند الواحد اربع لوز ثنتين في الحلق وثنتين منيب معلمكم وينها فيه كل واحد يتلمس روحه ويلقاهن
المهم والله يعينا على المهم
تنفخت اللوز عندي وطيح في فراشي سبوع كامل ولا طب في بطني شي مقدر ابلع شي وبغيت اموت منهن
وذكر اني منسدح عند الوجار ومي ياملا الفردوس تقرب البيز الي يمسكون به البريق او الدله تقربه عند الضو شوي الين يدفا ثمن تحطه على حلقي يعني تكمدهن
وكنا في ايام البرد يعني الشتا ويوم صرنا في اخر الاسبوع ويتظخمن اللوز خلاص مستويات ويتفجرن بغيت اموت منهن الله يكرمكم
ويوم تشاويت شوي قالت امي وش ودك تاكل ونا امك لك اسبوع ماطب في بطنك شي قلت ابي جحه ههههههه يالله حلها ونحن في الشتا هههههه منول مافيه جح في الشتاء كل فاكهه في وقتها بس
ومي ماتبي شي غير الجحه ونا امك ونا مصر ماابي الا جحه ولا حس ابوي ياملا الجنه جاي وهو يقول منذا الي مشتهي جحه قالت امي سحاب قال والله ياوليدي تبي تحتري الصيف الين يجي ابشر بالجح والجراوه بعد وقعد اصيح ابي جحه يعني ابي جحه
ومي ياملا الجنه تعرف نقطه الضعف الي فيني وتقوم وتجيب طماط وبصل وتسوي على الضو في الوجار تسوي مرقه طماط
وهي تطبخه وتقولي ياوليدي لك اسبوع ماكلتا شي ونا اشاهق ماابي الا جح
ويوم صارت جاهزه مرقه الطماط ونا كنت منسدح وقوم بشويش ونا اشاهق شره عليهم وراكم ماجبتولي جحه
ويوم قربته امي عندي في قدر صغيير خلاص مااقدر اقاوم صابني انهيار
ونا الي امسك الخبزه وعينك ماتشوف الا النور ماتسمع الا الرشخ وبلع الي في القديير كله ثمن قال ابوي هاه هلحين تشتهي جحه ونا ابوك ولا مالها شهوه

ونا الي ارسم ذيك الابتسامه تشوف ضرس العقل منها وهذي يسمونها ابتسامه الرضى
الله يغفر لهم ويرحمهم ويسكنهم الفردوس وكل مسلم
وفي حفض الله
وما نقول الا سبحان الله والحمد لله ولااله الا الله والله اكبر عددخلقه وزنه عرشه ومداد كلماته ورضى نفسه

[رامز]

يا مرحبا بك

من طوَّل الغيبات جاب الغنايم


مشتاقين والله لسواليفك لا تقطعنا

[سحاب شقراء]

المشاركة الأصلية كتبت بواسطة رامز

يا مرحبا بك

من طوَّل الغيبات جاب الغنايم


مشتاقين والله لسواليفك لا تقطعنا

ياهلا ويامرحبا ومسهلا بالغالي

بشرني عن صحتك

جعل ربي يوفقك ويسعد قلبك ويرفع قدرك امين

[سحاب شقراء]

السلام عليكم ورحمه الله وبركاته

هلا بالغالين ومرحبا

اليوم والله شفت صوره وضيقت صدري بالحيل
شفت طال عمركم صوره فيها يجي 20 بنت وكبار مهنب صغار مصورات قدام بيت السبيعي التراثي في شقراء
وكلهن فاتشات ماتغطن ومطلعات شعورهن وشكلهن مهنب سعوديات شكلهن سوريات والله العالم
ومهما كان ومهما صار ماتاصل الامور الا كذا ابد ولا نقبله ابد
الله لا يخزينا بس
وكان هذا التطور والتحظر مانبيه ابد الله لايبه
والله لوني شايفهم شوف العين اني مااخليهم معاد الا هي بعد

ولوهن جايات ومحتشمات كان بصرهن خلهن يتفرجن على البيوت القديمه الي صلحوها هلحين وصارت توسع الصدر
لا عادت على دنيا تبي تصلخنا من جلدنا
ترا مابقي في الدنيا الا السعوديه متمسكه بعباده الرحمن الرحيم ونجتنب مايغضب وجهه سبحانه
وكلن ترا حاسدنا ودهم تتغير النعمه والفظل الي انحن فيه - كل ذو نعمه محسود - ولوهم عايشين معنا يتمنون زوال النعمه الله يزيلهم عنا ويريحنا منهم

ولا اوصيكم يالغالين كلش ولا دينا وعاداتنا الصالحه وبلدنا هذولي لا تجاملون احد فيهن ابد

والله العظيم شوفوني احلف ان الشعب السعودي من اطهر ونقا وكرم ورحم شعوب الدنيا كلها وتراي ماقلته الا من تجاربي عشرات السنين وبخص الي انا اقوله
بس تغيرطبع بعض السعوديين مع كثره الاجناب الي جونا وجابو معهم الغش والكذب والخيانه وكل هذولي ماكنا نعرفهن في السعوديه قبل الطفره
ولاكن مهما حصل النخوه والفزعه والكرم والرحمه لازالت تصيطر على السعوديين وهذي نعمه من رب العالمين

والله خير حافض سبحانه

وخل اعلمكم بشي ونتم اعرف مني بس للتذكير

احفظو صلاتكم وحفظو كلامكم وحفظو افعالكم هذولا اذا تمسكتم فيهن فبشرو بالخير في الدنيا والاخره

ولا شاف الواحد منكم احد مسوي شي غلط يقول الحمد لله الله يهديه وبس ترا الي باليه مهوب عجز عنك يبلاك مثله

خل اعلمكم وشي موصيتني جدتي يومني توي صغييير جعلها للفردوس
وكنت انا وياها ساكنين في نخلنا في شقراء
وكان جدي الله يرحمه باني عند الباب الجنوبي للنخل كان باني مسجد من طين طبعن
وباني مسجد ثاني عند الباب الغربي

وتوصيني جدتي وتقول اسمع ياولدي

لا تخلي صلاتك ونا امك ابد
ون جاك محتاج لا تخليه يروح الا انت معطيه
ولا سمعتا كلام في الناس بالك تخوض فيه
وترا الدنيا خيبه للهي له ونا امك مهيب خلفه

ترا ذا الكلام قبل لا تنولدون كلكم الا كان راعي البراري ابو ناصر هو الي عود مثلي

الله يمتعنا وياكم متاع الصالحين ولا يظهرنا من الدنيا الا وهو راضي عنا ويختم لنا بالفردوس قولو امين

[بقآيآ .. حرف]

الله يصلح الحال ويهدي ضال المسلمين
شرفنا تواجدك يالغالي
كل التحايا