سحاب شقراء -سواليف الاولين ايام بيوت الطين والحياه الطيبه

[تميم بن محمد]

السلام عليكم ورحمة الله وبركاته

[سحاب شقراء]

عليكم السلام ورحمه الله وبركاته

هلا ومرحبا يبو محمد

[أبو سيرين]

السلام عليكم ورحمة الله وبركاته

هلا ومرحبا بالشيخ سحاب يالله انتحيه

ومثلها لإخونا تميم الله يتمم عمارته على خير ويعينه ويبارك فيها

[سحاب شقراء]

بسم الله صلى الله على محمد
الا بذكر الله تطمئن القلوب لا اله الا الله وحده لا شريك له


السلام عليكم ورحمه الله وبركاته

اخواني اخواتي الغالين كلكم وربي يشهد اني احبكم في الله



وبااعلمكم بشي تراي ونا اكتب انقر مثل نقر الدجاج للعيش يعني اكتب بصبع واحد عجزت اعرف بصابعي كلهن بس احمدو ربكم اني معرف بصابعي كلهن كان ماتلقون مكانن تردون علي فيه هههههههههه ابا املا كلش ههههههههه

وهذي سالفه حاصله لي ونا توي صغيييير منيب كبير اتركم معها عساها ترسم البسمه على وجيهكم الطاهره



وهذي سالفه مانيب ناسيها ماحييت اذكر وحده بنت مهيب عجوز ذا المره دخلت نخلهم وانا مانيب


كبير واشوفها تلقط ليمون ابوزهيره واللوميه او الشجره طايحه على الارض يعني ملامسه الارض


يعني نصها تقريبا والنص الاخر مرتفع شوي والقاها تلقط لومي وهي تحبي على ركبها المهم


اخذت عسيب نخل لقيته طايح وجيتها من وراها ماشافتني هذا المزح هالحين واكلخ عليها


واخرفش بالعسيب وتاقف من الروعه وهي تصرخ يمه يمه وتصير وسط الليمونه الشجره يعني


ماتقوا تتحرك وصبت اذانها ووجها دم الضعيفه وابحل بها وانا توي صغير مانيب كبير وتجلس تصيح


وتنافض من الروعه تقول مشبوكه في الكهرب هههههههههههههه وانا غشي عليها من الضحك من هبالي وهي اكبر مني واجلس اكسر الغصون


حقة الليمونه الين طلعتها وتمسكني وهي تقول ونا بنت ابوي هههههه و تغولني غول وتحوسني حوس وتاطا في بطني


مانيب ناسيها ذيك البنت ما حييت مردغتني مردغه الين غنا حمار بطني والاعتراف بالحق فضيله


يانشطها اجل ترفعني وتخبط بي ايه بنت فلاليح وش عليها تصدقون حمقت هالحين هههههههه


بس عزالله ان ابوها جاب بنت ماهيب بنت وبس الا رجال ذيك فعايل رجال ههههههههههه اخاف


انها من المتابعين للسباحين وتبي تعرفني ههههههه اتحداها هالحين تمد يدها علي هههههه وشو عقبه الله ستر علي صرت احلم فيها في الليل جلدتني الين صرت مثل البطانيه الله من النشاط


ماشاء الله عليها المفروض ذيك في المصارعه الحره تبي تاخذ الحزام على طول ابد
تشوفون المصارعه اللي في التلفزيون مثلها بالظبط تشيلني فوق وتخبط بي كم مره وانا اذا قومتني تبي تسوي حركه ثانيه اقوم اطاوعها اصلا مدري وين انا فيه مستسلم واختلطت اموري في بعضها


وتكرمون بولت على روحي منها بس عزالله انها خذت حقها وحق غيرها مني اخاف انها هالحين


تقرأ ومبسوطه باللي سوته فيني هالحين تلقونها يدق لها الماء والتمر يعبطونه لها اكيد


مالها ولاسن اصلا تبي تصير مهذريه ههههههههه تراها يوم تطقني ابا اعلم عليك تراها دوبيييييه


هالحين خذت حقي ههههههههههه هالحين الله يمتعها متاع الصالحين وابا اقولك شي يالعجوز الله


يحللك ويبيحك مني بس مهوب حق ولا هوب واجب اللي سويتيه فيني انتي توحين والله مدري


يالله حسن


الخاتمه تلقونها مهذريه هههههههههههههه هذا كانها حيه هههههههههههههه مابعد قوه الا ضعف


هههههههههههههو وكانها ميته الله يغمد روحها في الجنه والله يحللها ويبيح منها

وسبحان الله وبحمده
وسبحان الله العظيم -- عدد خلقه وزنه عرشه ومداد كلماته ورضى نفسه

[سحاب شقراء]

بسم الله صلى الله على محمد
الا بذكر الله تطمئن القلوب لااله الاالله وحده لا شريك له
يالله تحيي الغالين كلكم صغيركم وكبيركم ذكركم ونثاكم

منول يالغالين الا دخل وسم الامطار وقالو بكرا دخول الوسم تمطر الليله مايبطي المطر ابد وهذي رحمه ربي بعباده سبحانه هوعارف ان عباده بحاجه للمطر وهو ارحم الراحمين
يقومون الناس منول في دخول الوسم ويروحون يبعلون وشلون يبعلون اعلمكم يالطلعه التاليه وشلون
ياخذون معهم قمح يعني عيش وكلن على قدر استطاعته مهناش منول الدنيا فقر
ويطلعون للبر ويحرثون الارض وينثرون العيش ويدفنونه ثمن يامر ربي سبحانه السحاب ويجي ويسقي زرعهم ثمن ينبت وهم ماتعبو فيه لا يسقونه ولاشي
وفي الناس منول ذمه وخوف من الله يعني الا مر راعي البعارين وراعي الغنم يبعدونهن عن زرع المسلمين ولو ماعنده احد
ولا سنبل وستوا يجون هم وعيالهم وحريمهم ويحصدونه ثمن يذرونه ثمن يطهرونه ثمن يجرشونه ثمن يخبزونه وياكلونه

تدرون سنه من السنين يوم ابطا عليهم المطر صار سعر العنز بعيالها 5 ريال وقل بعد


خل اعلمكم بذا السالفه
فيه ناس عندهم مزارع حول بعض وتجي ذيك السنه القحط وماجا فيها مطر وبدت زروعهم تيبس
وسبحان الله العظيم وتجي ذيك السحابه المحدوده ترعد وتبرق وتمطر على مزرعه في وسط المزارع وتسقيها الين ارتوت والمزارع الي حولها ماجاهن ولا قطره
وتعجبواهل المزارع منذا الشي الي حدث وراحو لراعي المزرعه وقالو له وش انت تسوي يوم ربي مسقي مزرعتك من بد مزارعنا
قالهم راعي المزرعه ابد والله انا معاهد نفسي ان ثلث العيش لي ولعيالي وثلثه الثاني اوزعه على الضعوف الي في الديره والثلث الثالث ابيعه وشتري فيه
قالو بس هذا هو السبب ونحن ناكله كله ولا نتصدق بشي منه سبحانك يااكرم الاكرمين

وخذو ذا السالفه بعد عن الزرع والمزارع
انتم تخبرون ان العيش مايسنبل ويستوي الا في وقت المراويح السحاب وغلب مطرها برد
ولا قدر الله وضرب العيش وهو حول حصاده خلاص يروح تعبك كله لان العيش كله في الارض من ضرب البرد وفيه واحد قبله يدعي ربه يالله تسلم عيشنا من البرد يالله انك ترحمنا
وتجي ذيك السنه ويحصد عيشه ويو حصده وحطه في صوامعه او غرفته وتجي ذيك السحابه ترعد وتبرق ويناضرها راعي المزرعه وهو يقول تظارطين ولا ماتظارطين العيش وحصدناه
وسبحانك ربي وهي تجيه السحابه بمر ربها وهي الي تنهمر امطار طوفانيه على مزرعته وتجرف المزرعه وبيته الي فيها وتواسيه بالارض وصوامعه شالها السيل
وخلت المزرعه مجرا للسيل يعني مثل الوادي ولا عاد تصلح ينزرع فيها ابد

يجب ان نتئدب مع الله في القول وفي العمل
هذا الي جناه على نفسه ولا وشوله يستهزي بئايه من ايات الله سبحانه
المفروض انه يحمد الله ويشكره انه حصد عيشه ولا جاه شي هلحين يالله لا عيش ولا بيت ولا مزرعه

اذكر سنه من السنين ونا في نخلي او مزرعتي الي في شقراء يوم توي جاي ابا اشغل المكينه البلاكستون الهنديه
ويوم توي جاي ولا فيه ساقي عقب جدي جعله للفردوس بانيه من فروش الحصا ولا فيه الثعلب المكار
بس انحن نسميه ابا الحصين او الحصني المهم ذيك السنه سنه غلث يعني سنه ينمرض فيها الثعالب ويصير همه انه يعض احد بس المهم يوم جيت عند الساقي ولاه جاي يبي يلف وسط الساقي ونشب فيه
وكان ابوي معي جعله للفردوس ويوم شافه قالي ياسحاب ارق ونا ابوك على النخله اخاف يعضك وخلني انا وياه ابا اموته ويجيب ابوي ذيك الماصوره وهو الي يجلده الين مات

وترا يالغالي هذا وقت بدايه طلوع خشاش الارض مثل الداب والعقرب وهن اخطر شي انتبهو الا رحتو للبر او صرتو في المزارع ترا كلش يجهش وبس قظت سوالفي الي مثل وجهي بس وش تبوني اسوي


وكملت ودملت وركبت حميرها وشنقلت

الله يجمعني وياكم في واسع رحمته ومغفرته ووالدينا وجميع حبايبنا

وسبحان الله وبحمده سبحان الله العظيم
عدد خلقه وزنه عرشه ورضا نفسه ومداد كلماته

[أبو سيرين]

السلام عليكم ورحمة الله وبركاته

مسيت بالخير يا عم سحاب .... كيف الحال

وين تميم غايب ما أشوفه عساه طيب ..... الايام هذي كأن فيه عج في الديره ... ولكن

يـا مـا سـلـكـنـا الــدرب بالعسـر واللين /// مــا هـمـــنـا لــو مـــر بـرق وعجـاجه
مـا هـمــنا لـو كـــــان فــيه الـشـياطـين /// لــو كـان فــيه الصاحي والا الدجـاجه
نمشي ولا نرضى بسوى الطيب والدين /// لا شــافــنـا الـطــاغي يـــدور هجـاجه

أنا أقرى سواليفك لكن أحيان ما يكون عندي الوقت أرد فاضطر إني أأجل الرد لين أفضى فلا تواخذني ولكن تأكد إن الكثير متابع لسواليفك وعلومك الطيبه

ههههههههه ههههههه تبي الصدق والله في سالفة البنت اللي عند شجرة الليمون حسستني وكأنك بالشام مو بشقرا هههههههههههههههه ما شاء الله ليمون ونخل وجو لطيف ووجه حسن ههههههههه

[سحاب شقراء]

هلا ومرحبا يبو سيرين

ياماحلا دنياي في دارنا الطين

عايش ووقتي صافين بي مزاجه

واليوم دار الوقت والناس دارين

والشكوا لله ماعرفنا خراجه

العلم ظايع ويابسات البساتين

والليل مظلم ما ينور سراجه

سحاب شقراء

[سحاب شقراء]

ياحمامن يغرد بالحوني
هاظني صوتكي يالراعبيه

هم يبوني ولا مايبوني
علمهم عند علام الخفيه

سحاب شقراء

[سحاب شقراء]

السلام عليكم ورحمه الله وبركاته



تصدقون ان الغنم منول ما بقالها الا شوي ويتكلمن منول كل بيت فيه غنم ولا جاء الصبح

فتحوا لهن الباب اللي عنده 4 واللي عند 5 واللي 6 المهم اغلب الناس يفتحون لهن البيبان

الصبح ويروحن لحالهن سبحان الله العظيم الين حوش الشاوي ما معهن احد الا جاء الصبح

ويلاك تشوفهن في الشوارع يتلاقن مع بعض كنهن رايحات للمدرسه هههههه المهم يجتمعن

كلهن عند بيت الشاوي اذكر بيته في السكه اللي تجي هالحين من شارع فيصل وتدخل على

سديره بيته في طرف الشارع وسبحان الله العظيم يجتمعن غنم المسلمين في وقت شبه واحد

ثمن يسرح بهن الشاوي واذكر معه وانتم بكرامه حمار ضعيف
ورانا نقول ونتكلم

بكرامه مخلوق من مخلوقات الله عز وجل المهم يركب الشاوي حماره والغنم كثر التراب

تمشي وراه ويسرح بهن ولا جاء حول المغرب ولاه جاي وسبحان الله العظيم كل غنم ناس يروحن

لحالهن يعني كل غنم بيت يروحن لحالهن وشلون يدلن سبحان الله العظيم واذا وصلن بيت

اهلهن اما يلقن الباب مفتوح ويدخلن والا جلسن عند الباب يثاغن يعني يا اهل البيت افتحوا لنا الباب
والله اني صادق ويحصل احيانا حالات عشق بين الغنم وتروح غنمه حقت ناس مع

غنم ناس ثانين ثمن يجلس راعيها يدور عليها تدرون وشلو يدور عليها يمشي في السكيك

ويقول بصوت عالي يامن عين الشاه جزاه الله خير كانها شاه والا يقول من عين العنز الصمعا

جزاه الله خير يوصف غنمته الاي يدور عليها وتحسبون الناس الا سمعوه طنش لا ما فيه

طنش والله اني صادق الا سمعوه كلن يطمر ويروح يشوف غنمه لياها معهن يازين

منول تدرون ان منول الا قالوا بكرا يدخل الوسم وسم المطر طبعا انها تمطر في ذيك الليله

مجازيهم ربهم بحسن النوايا وطهاره القلوب ما فقدنا نزول المطر الا في ذا السنين والا

منول ما نعرف دخل الوسم عساه يمديك تنزل اللي في سطح دارك والا جاه المطر تراهم

منول يستغفرون الله واجد والاستغفار هو باب الرزق بالمطر والمال والعيال الله يحسن

خاتمتنا الهتنا الدنيا عن الاخره الله المستعان

[أبو سيرين]

يا هلا يا عم سحاب

طيب هالحين لو تفك الشبك للغنم تشرد ولا عاد ترجع هههههههه ما أدري الفرق عن أول حتى في البهايم ههههههه

صدق والله يعني تحس من القصص إن الاختلاف في كل شيء ... أنا أعتقد إن الناس أول فيهم بساطة لدرجة أن البهائم تفهمهم وتحن عليهم بعد

لأنهم من أول مو بس يعطيها الأكل والماء فقط وإنما ممكن يحضنها ويتكلم معها وينام معها بعد من بساطتهم

بعكس اليوم صاحبها يعطيها العلف وهي تعرف إنه ما أعطاها إلا لمصلحة فقط وليس رحمة منه .. هذا غير البيئة اللي يحبسونها فيه واللي لا تلائم كائن حي مهما كان

وهذا مصداقاً لكلام الرسول صلى الله عليه وسلم عندما أخبرنا أنه في آخر الزمان الحيوانات المفترسة تصبح وديعة ولا تأذي الناس

وهذه فائدة القصص التي تفضلت بها يا عم سحاب لأنها تعطينا تصور دقيق عن ما وصل إليه الناس اليوم من أنانية وجشع لدرجة أن الحيوان اليوم غير الحيوان بالأمس .

فسبحان الله خالق كل شي

شكراً لك