سحاب شقراء -سواليف الاولين ايام بيوت الطين والحياه الطيبه

[رعد الشمال]

يا الله

سحاب مخمخت مع كتاباتك عز الله أنه تفتح النفس وتذكرنا بالماضي
يازين الماضي يازين البراءة الكبير والصغير على نياتهم

ضحكت من قلب على
$
$
$
واذكر امي كانت تلبسني كرته حقت البنات مدري شاكين فيني والا انها كانت تحلم

ببنت وطلعت انا والله العظيم اني صادق ذيك الكرته الي مزموومه تحت الصدر
ههههههههههههههههههههههههههههههههههه

الله يونسك ويسعدك ياشيخ

[سحاب شقراء]

المشاركة الأصلية كتبت بواسطة رعد الشمال

يا الله

سحاب مخمخت مع كتاباتك عز الله أنه تفتح النفس وتذكرنا بالماضي
يازين الماضي يازين البراءة الكبير والصغير على نياتهم

ضحكت من قلب على
$
$
$
واذكر امي كانت تلبسني كرته حقت البنات مدري شاكين فيني والا انها كانت تحلم

ببنت وطلعت انا والله العظيم اني صادق ذيك الكرته الي مزموومه تحت الصدر
ههههههههههههههههههههههههههههههههههه

الله يونسك ويسعدك ياشيخ

يالله تحييه وياهلا ومرحبا رعد الشمال

والله اني صادق اجل يلبسوني كرته هههههههه

شرفتني شرف الله قدرك ومقدارك

[أبو سيرين]

هههههههههههه

الكرته اذكر يبيعونها في البقالات ههههههه

الله يسعدك يا سحاب

[سحاب شقراء]

المشاركة الأصلية كتبت بواسطة أبو سيرين

هههههههههههه

الكرته اذكر يبيعونها في البقالات ههههههه

الله يسعدك يا سحاب

هههههههههههههه لا يبو سيرين الي يبيعون في البقالات ثياب صينيه
الكرته يخيطونها العجيزات منول اذكر كل حرمه عندها مكينه خياطه الله المستعان يبو سيرين الدنيا تغيرت الله يكفينا شرها شرفتني يالغالي شرف الله مقامك

[سحاب شقراء]

الغيره الزايده احيان مالها داعي

يالله تحييهم جميع وتسعد قلوبهم وتستر عليهم امين يارب العالمين


اذكر من موووبطي ونا صغييير اروح عند حرمه مهيب عجوز ذاالمره هههههه تبي تقولولون قبلك عند الناس ترا الناس منول يمونون على بعض وعيال جيرانهم يجون عندهم احيانن من الصبح الين المساء اذا كان عندهم عيال يلعبون معهم ايه مهوب تقولون عني اني قبلي عند الناس ههههههههههه المهم ذا الحرمه ماشاء الله عليها جميله ولاجابت عيال الله سبحانه ما كتب لانه سبحانه هو المعطي لااله الا هو وكان رجلها يعيي عليها تروح او تجي لانه يحبها ويغار عليها غيره الله يدفع البلا وترا بعض الغيره الزايده تتحول الا الشك الله يسترالمهم الا بغت شي احيانن نادتني اذا شافتني مار مع السكه تقولي سحاب ياسحاب ونا اقول سمي ياحليلي يومني صغير ما اقول هاه ابد هههههههه المهم تقولي تعال وروح يمها وتقولي خذذا الفلوس ورح للدكان الي جنب المخبز وهي تعاني الي عند مغسله الموتى منول وهذا في شقراء وتقولي جب جبن كرفت وجب مربا جح ترانا نسمي المربا منول - جام -هههههههه مدري وشي جام ههههههه المهم وجب بنص ريال خبز والنص منول يجيب 4 خبزات اوهو 6 مدري ناسي المهم اقول ان شاالله وااخذ العلاقيه حقه الخبز حقتهم وروح وجيب المطلوب ولازم عاد اكل منه الا جبته منيب حمييير علف هههههههه وهي والله تحبني لاني مملوح وكلي ملح وقبله ههههههههههههه المهم رجلها جا ونا قاعد في الحوش وقال ياهلا ومرحبا بسحاب قلت طيب مدري وشلون ارد وقعد معنا وفطر قال من جايب ذا الخبز والجبن والجام قالت حرمته سحاب الي جايبهن انا عطيته قروش وجابهن وقلت له اقعد افطر معي وقعد الله يصلحه يوسع صدري - وبن الحلال رجلها ما يبخل عليها بشي يعني كريم ويده سخيه وبا اعلمكم بعد عن رجلها تو ابوه ميت ومرث له دراهم واااااجد الله يزيده من نعيمه مهوب مثل بعض الناس الي ما ورث الا الظغط والسكر وحساسيه في الصدرههههههههههههههه المهم قال ابا اروح للقصاصيب ابا اشتري لحم ثمن ابا امر حليوه وحليوه سوق شقراء القديم وهم جددوه هلحين المهم يقول وبا اجي ويوم راح وصك الباب وحرمته تروح وتويق عليه مع شق الباب ونا معها اويق بعد الله من القافه فيني بعد ههههههه وثره يسوي سوات ما تنتسوا وشو يسوي انا اعلمكم انتم خابرين السكيك منول كلها تراب وثره الا طلع من بيته يكب تراب على عتبه الباب يبي يشوف جره حرمته هي تطلع ولا لا ياشين الغيره الزايده الي مالها سنع وبس ويوم راح قالت حرمته سحاب خذ ذا السعفه وكنس التراب الي على العتبه حقه الباب وقوم وااخذ سعفه والسعفه كسره عسيب نخل هذي المكانس منول وكنس التراب الي على عتبه الباب ثمن قالتلي ابيك ياسحاب تقعد عندي الين يجي ابو فلان الي هو رجلها قلت طيب عاد انا وش عندي من الاشغال هههههههههه تدرون وش قعدنا انا وياها نسوي وش تعتقدون انا اعلمكم قعدنا نلعب ام ثلاث وهذي لعبه يبي يعرفونها ناس واجد ويوم درينا بسم الله علينا الا الي يفتح الباب بقوا شي ويدخل علينا وثره رجلها ويوم شافنا جالسين وهو يضحك قالت حرمته انت وش فيك روعتنا بدخلك قال لا بس بغيت اطيح وتقظبت في الباب بس قالت اسمع عاد انت رجالن تبي تسنع ولا دارابوي وسيع ويبي ياخذني ترا الي انت تسويه ما يسويه رجال وشكك مهوب في محله قال وشذا الكلام قالت هذا الكلام انت تحسبني مدري عنك يومك تكب تراب على عتبه الباب كل ما طلعتا وهذا سحاب هو الي كانسه تو والله ياجماعه الخير من حبه لها وهو يجي ويحب راسها وهي تبكي وتعوذ من الشيطان ويقوم ابن الحلال ويعطيني 4 قروش ذيك الي كبر عيون البقر وبغيت يغمى علي هههههههههههههههه ونفعل انا وقوله وراك تصيحها وقعد اصيح معها انا مدري صياحي من زود فرحتي ب 4 قروش ولا علشانها مدري كلش اختبص عندي ههههههههههه وهي الي تمسكني وتحبني يبوني اسكت يبوني اسكت وصياح وشر بيديني عليه مثل الي اقول وراك تسوي كذا وصياح وصياح حرمته سكتت ونا ما سكت الين صرخ علي ذيك الصرخه الله لا يلومه قالي بس اسكت ولا انقلع لياني الخك بكف ههههههههههه تغيرت الاخلاق وقعد اتعبر والحرمه مغير تحبب فيني وتقولي ما عليك منه هماي اقولكم كلي ملح وقبله هههههههه كنه جازلي الوضع هههههههههههه المهم امورهم ابشركم زانت هذا الي ادري عنه والي مدري عنه مدري وش اسوي بعد اعلم الغيب ههههههه كن احد قايلي شي هههههههههه ونتهت السالفه

وفي الاخير مانقول غير

سبحان الله والحمد لله ولا اله الا الله والله اكبر

عدد خلقه وزنه عرشه ومداد كلماته ورضى نفسه

[سحاب شقراء]

وراكم ماتردون علي يالغالين

او سواليفي ماجازن لكم

[رذاذ]

ربي يسعدك ياسحاب هههههه
والله إني من الفجر قريت سواليفك ،، لكن ماقدرت أدخل وأرد عليك ..
كل ماضاق حالي ألقى نفسي هنا ..
ياسحاب انته تقول جام .. ومدري وش يعني .. ههه
المربى إسمه بالانجليزي جام ...
أجل كنتو تتكلمون إنجلش من أول .. ههههه
بغيت أكتب لك ياعم سحاب مثل أبو سيرين .. ههههه لكن ماطاوعني قلبي .. أحس إنك شباب هههه
لكن الأكيد إنك أكبر من رعد الشمال

[أبو سيرين]

بالعكس يا عم سحاب متابعين ولو تلاحظ عدد المشاهدات يرتفع يوميا

وسواليفك ما تمل والحقيقة انها توصف كثير مما مر علينا في وقت الطفولة حتى الاناشيد اللي ذكرتها والألعاب كلها مررنا بها ورددناها كثير وكنت ما احفظها حتى بعضها نسيتها مثل اغنية حصة بنت عقاب ( الدباب عند الباب يبي حصة بنت عقاب ) مدري وش قصتها ولكن نسيتها وانت ذكرتنا معظمها وادخلتنا أجواء كدنا أن ننساها خصوصا مع تسارع الزمن وتوالي الأحداث .

الله يوفقك ويرزقك من حيث لا تحتسب
موضوعك بالنسبة لي أهم موضوع اتابعه حاليا تكدرت شوي وبغيت أغيب لكن موضوعك أجبرني أستمر بالمتابعة

وجودك مهم واصل حفظك الله

وادعوا الله لك التوفيق والسداد

[عبدالمحسن الرحمه]

دام هذا الابداع ياسحاب الله يوفقك زدنا بارك الله فيك

[سحاب شقراء]

المشاركة الأصلية كتبت بواسطة رذاذ

ربي يسعدك ياسحاب هههههه
والله إني من الفجر قريت سواليفك ،، لكن ماقدرت أدخل وأرد عليك ..
كل ماضاق حالي ألقى نفسي هنا ..
ياسحاب انته تقول جام .. ومدري وش يعني .. ههه
المربى إسمه بالانجليزي جام ...
أجل كنتو تتكلمون إنجلش من أول .. ههههه
بغيت أكتب لك ياعم سحاب مثل أبو سيرين .. ههههه لكن ماطاوعني قلبي .. أحس إنك شباب هههه
لكن الأكيد إنك أكبر من رعد الشمال

هههههههههههههههههههه والله العظيم ان انحن في شقراء نسمي مربا الجح بالجام

مثل قلم الرصاص اول ماطلع نسميه بنسل

مثل السيارات اول ماجت نسميها موتر

وكثير من المسميات

مثل الفاكهه ماكنا نسميها فاكهه نسميها ميوه ههههههههههههههه

ورقه اللعب نسميها جنجفه

الشاهي نسميه الحلو

الماصوره نسميها قلمه

الدريشه نسميها طاقه

الدباب نسميه الطقطقان

السيكل نسميه حصان بليس

الشيشه نسميها البرباره

الدخان نسميه تتن

التلفزيون نسميه تلف عيون ههههههههههههه

والله يالغاليه رذاذ ودي اني صغييير ومن الي يحب انه يصير كبير في العمر بعض الرجال يزعل الا قلتل له انك كبرتا يافلان

هذي قصيده كتبتها انا عن الكبر عساها تقنعك ولا والله ودي يابنتي ان توي صغير من يعاف الشباب يالغاليه

ياحمامن يغـرد فـوق غصن الجريد


هيض الروح نوحك وبالخفا صابها


ول يالــورق وشحــدك عليـه تعيـد


همــوم قلبـن قديمه ومغلق ابوابـها


كــل حبلـن فـتـلـتـه تنقظه يالعنـيـد


شوفي يالورق نوحك سبب اسبابها


راح ثلثـيـن عمري مابقا من مزيـد


شايبن شف عصاته تسبق خـطاتـها


يالله انـي طلبتـك ونت فـردن وحيد


تغـفـرذنـوب عـبـدك عليـت اوتادها


ياعظيمن تعــلا وتحت عرشه عبيد


اغـفـر ذنوب عبـدن قرب احسابها


رحمـتــك ياالاهي وغيــرها مانريد


وجنــه الخلــد نسكن عالي انسابـها

سحاب شقراء