يابو سعود انا من البيت مليت // يابو فهد تشكي وانا شكي وياليت

[الركام]

يابوسعود أنا من الـبـيـت ملـيـت
مليت من شوف الكنب والوسادة

لا شفت نور الصبح ياخوي ونيت
ابي نشوف الربع عقـب الوحـادة

يالله يا اللي فارض الحج للبيـت
جعلك توفـقـنـا لـدرب السعــادة

لا شـفـت طيـرٍ طائر قـلت يالـيـت
لـيـتـه يوديـني لـدار الـحـمــادة

أقوم بالواجب وأدور على الصيت
ولا سـيـر الـغـالي بـيـغـلا زيـــادة

كـل السنين المـاضيـة ماتمـنـيــت
وأمشي مع اللي مايعرف القرادة

واطلب من الله كل ماقمت صليت
انـه يـمـكـنـا بـشـهــر الـعـبــــادة

سعد بن ثنيان الثنيان
ابوفهد

ياابو فهد تشكي واناشكي وياليت
يالـيـت كـل جــات لـه في مـراده

متعودين نروح ولا حدنا الـبـيـت
لكن قرار جـا من اهل السـيــاده

حل الوباء في الناس وانا استكنيت
وقالوا عليكم بالحجر فـيـه افـاده

لـو كـان ماودك ولـو ماتـهـنـيـت
امـر يجـيـنـا نلـتـزم بـه سـعــادة

هذا هو الواجب ولو قلت ملـيـت
يالـيـت كـل طـبـقــه فـي بـلاده

نسلم من العدوى ولا يكثر الميت
ولا يجي فـي مـجـتـمـعـنـا ابـادة

اراقــب الرادار ولا قـد تـعـديــت
اصبر ولو شفت العنا والجــلاده

وشلون لو جا سيل ولاله تلقـيـت
متـغـيـر طبـعي ولاهـيـب عــاده

يالله ياللي خالق الخلق واجريـت
على الـبـشر ماحـل والك الارادة

تزيل ماهم البشر وانك اعـطيـت
للي يـتـوب ويعـتـبـر مـايـعــاده

وصلاة ربي عد ماصبحت وامسيت
واعداد نطق المسلمين الشـهــادة

ابراهيم بن سعود الخريف

[بقآيآ .. حرف]

صح لسان الشاعر الثنيان
وصح لسانك يابو سعود
أسأل الله أن يزيل هذا البلاء عن بلادنا وبلاد المسلمين
كل التحايا

[عبدالمحسن الرحمه]

صوت وصدى رائعين صح الله ابداعكم
جميعا

[خالد بن منشار]

صح لسانك ولسانه

لاهنتم ماقصرتم مبدعين اثنينكم

[ابن حماد]

صح لسان الشاعرين المبدعين