هدية السامر
شاعرنا حمد السعيد لم يعثر على طيره وحزن كثيراً لفقدانه وكان كل مايتمناه هو أن يكون ذلك الطير في حالة طيبة وغير جائع ولم يؤثرفيه البرد فانتشرت قصيدة الطلح انتشارا واسعا وسمع بها الجميع ومن ضمنهم سمو الامير عبد العزيز بن سعود((السامر)) وهو من عشاق القنص ومن عشاق طيور الحرار فأحس بمعاناة حمد السعيد وحزنه العميق وهو يناجي شجرة الطلح وينشدها عن طيره فأهدى سموه للشاعر حمد السعيد طيرا من أطيب طيوره عوضا عن ما فقده فكان لابد ان يسجل هذا الموقف لسمو الامير عبد العزيز بن سعود فكانت هذه الابيات التي كتبها الشاعر حمد السعيد وهو يصف طيب سمو الامير عبد العزيز بن سعود مع وصفا دقيقا للصقر
حيث يقول
يالبازعي طيري طلع مثل راعيه === زولٍ وفعلٍ والمواري تشابه
بالطلع موقف ما لقي من يماريه === عساه يسلم سيدي يوم جابه
له ماكرٍ في بر فارس محاريه === كني اشوفه يوم خاطوا قطابه
صفاة وجهه مع شدوده توديه === ضمن الحرار ولا وراها طلابه
النادر اللي يوم عزمت اسميه === سميته السامر واشوفه زهابه
ليا قفيته شفت دقٍ محنيه === وليا نطحته من عيونه تهابه
كن الثريا في قواطي مواميه === ابيض نحر كنه يشع الضوا به
هجرٍ قصيرالساق جبره ثناديه === وله عاتقٍ يعطي شموخ ومهابه
ليا مسح وجهه ونهض مواطيه === يطري علي اللي عزيزٍ جنابه
به من طبوعه مشبع اللي حواليه === وماخذ من طبوعه ليان بصلابه
وجهه ليامن صاد يشبه محاليه === لا بشر بضيـفٍ وردد هلا به
لا تل سبقه قلت يا طير لبيه === واقفى وكني كاسبٍ به ثوابه
وجاهن وهو كن المنايا تباريه === زيزوم قوم وفزعوه القرابه
اللي معه بالطلع ما عاد يمديه === ياصل مطاليعه وهو ما درى به
من عادته برق الدواغر مداميه === في صيدته الطير غمقٍ صوابه
ليا ضرب ما وافق الضرب يفريه === كن بيمينه من سيوف الصحابه
ينقى كبير العرف ما هـو يخليه === من خيشة قدمه نهبها نهابه
يا سعد عين اللي قنص عانيٍ فيه === طيرٍ وماخذ من طبوع الذيابه
لا صارت الدعوى عناد ومشاريه === إخذه وكنك ماخـذٍ معك لابه
الطير احبه حيل من حب راعيه === عبد العزيز اللي عزيزٍ جنابه
الشيح
هذه قصيدة أخرى لشاعر المقناص حمد السعيد وهي بعنوان الشيح ، والشيح نبات ربيعي له رائحة زكية ينبت في السهول والفياض ويستعمل لعلاج بعض الأمراض ويشرب مع الشاي أو يشرب لوحده، وهاهو شاعرنا العذب يناجي هذه النبتة بأسلوب رائع وجميل في لحظات وداع عند نهاية فترة المقناص والعودة للديار
يقول حمد
ماجيت منك وخاطري فيك يالشيح === ما جيت منك الا وانا خالصٍ منك
طرت على قلبي طواري المراويح === للديره اللي شوفها يعوضني عنك
قال الشيح
الله اكبر كن مالك مساريح === بفياضنا ذي جرتك ذا تفننك
ماكن مريتوا قنوصٍ مصابيح === من كثر صيدي عقب الامحال مسمنك
قال حمد
ودعت بك ربعٍ كرامٍ مفاليح === بعيونهم عشقٍ قديم لمواطنك
وانا دموعي مثل دمع التماسيح === يا موطني يالله عسى الخير يسكنك
قال الشيح
يرزقني اللي منشي السحب والريح === وبلٍ يخلي كل روضٍ يجننك
واللي قعدوا عندي عساهم مرابيح === فقعٍ وصيدٍ وانت يالعجل ما أرعنك
قال حمد
يالشيح دوك ايدي شهبٍ مجاريح === من قو بردك نشعلك ثم ندفنك
ولالقيت بك الدفا وهبة الريح === كم ليلةٍ ازرت ظلوعي تزبنك
قال الشيح
مثلك يبي رمثٍ وبيضٍ صحاصيح === ياذا المسافر تو بينت معدنك
روح وباكر لا لفيتوا مشافـيح === والله لادسس كل ما تشتهي عنك
قال حمد
يالشيح ما قصدي ملل يوم انا اصيح === يالشيح شوق لديرتي وانت ما ازينك
يطري علي (خالد)عقب وقفة الريح === واهل دمعٍ لو تحسه يحزنك
انا اتحضن وهم وافز واطيح === وانت السحاب وكل نجمه تحضنك
ملتاع
ما لملتاع في فعله ووصفه نظير === آخذٍ كل ميزة بالوفا والتمام
لو بغيت آصفه الموصف يحير === منوة اللي بقلبه للصقارة غرام
لا صغير ولا بالوصف عبج كبير === كنه مفصلٍ بالزين تفصيل خام
أفدعٍ محدبٍ متسندٍ مستدير === وافي الطول واف العَرض جبر العظام
وارد الوجه وكراعه جلالٍ قصير === واخذاتٍ كفوفه من كفوف الغلام
والسراويل كاسياتٍ اسبوق الحرير === افجحٍ كنه اللقاي وزن المقام
في قحوفه سنا عينه سنا نار كير === فاصلاتٍ بياض الراس مثل الوشام
ولاش ظني مثل بوزه ولا بوز طير === والمناكب تزايمها الثنادي زيام
مكتسٍ من دقاق الريش شين يسير === خُف ريش القطا بالوصف وألا الحمام
والظهر يطرد به مثل موج الغدير === والنحر بترةٍ مطليةٍ بالرخام
وغير الوصاف له فعلٍ يشوق النظير === لا درع فالذهيب اللي عليه الكلام
لا قنص به طلوع الشمس وألا العصير === وشاف بيض الدواغر في بطون المحام
لا خذوا عنه ثم حقق وشن المغير === ثم تنكس عليهن في مذار الثمام
صب مره على عود يقب الهدير === لا اعترض في حياله جندله بالحسام
يضربه ضربة القرم النشيط الشطير === ضربةٍ عقبها ما يستطيع المقام
وكان خصمه ليا شافه تلقى الفرير === يوم شاف الصمايل طق طقة ادهام
جاه يوم عبوس قمطرير === جاه من فوقه كنه من صواريخ سام
ولا حصل عن أسباب المنايا منير === لين تروى المخاليب الظمايا الحيام
طاح من فعلهن طيحة مدقٍ ببير === ميّت قاضٍ فالجو ماضٍ قوام
وشاعرٍ ما فعل ملتاع له ما يثير === عقب حافه وشافه يغتشيه الملام
واكتفيت بقليلٍ موجزٍ من كثير === والعذر والسموحة والسلام اختام
الشاعر غازي بن عون
عساف
البارحه جفني بحلو الكرى عاف === ودموع عيني مثل وبل الشخاتير
انحاس بالي يوم ضيعت عساف === اللي غدا يطرد صفوق المغاتير
اقفت به الربدا على الحد بأطراف === شمالي البترا بعرق المظاهير
قمت اجدع الملواح في كل مشراف === باح العزا مني ولاجاني الطير
وانا على طيري كثير التحساف === اللي يصخر هارب الربد تصخير
ومن سو حظي ضاع في وقت الأنكاف === ولا عاد من فرصه نرد المداوير
الشاعر سلمان بن دغيم
شقر الحرار
يا زين جمعتنا على شبة النار === نارٍ سناها لدلال المباهير
امكرمات وسطهن بن وبهار === وسوالفٍ تطرب سموع المناعير
ناخذ لنا فالوقت سجة ومشوار === بين الفياض اللي زهتها النواوير
أرضٍ خلا ما داجها كل دوار === غير الحباري واشقح الريم ماذير
تلقى جرايرهن مع الروض عبار === زرق الغلب برق الظهور المخامير
هي منوة الي بالصقارة لهم كار === تشفق ضمايرهم على تلة السير
لا حولوا في فيضة كنها الطار === وتكافخن بيض الدواغر مياسير
ردوا على كن وجه ليا دار === وجه الغضيب اللي على علم وصغير
ليا انطلق ما كنه الى يبي ثار === يسوق في سوق الخصيم التباشير
أفحج سراويله على الكف نشار === عينه كما وصف الشمالي سناكير
يهوي عليهن مثل قصاف الاعمار === دابان ما عنده مراود وتأخير
إلى انطلق ما كنه ألا يبي ثار === يسوق في شوف الخصيم التباشير
شقر الحرار اللي لها أفعال واذكار === من ساس فارس وافياتٍ مغاتير
الشاعر مشعل عوض العتيبي
الطير والحبس
هذه سالفة لراعي طير اسمه عبود عنده طير وقد وضعه في شبك في وسط حوش البيت وعنده أطفال صغار دخلوا على الطير داخل الشبك وهو على وكره وكان برقعه مكشوف عنه لأنه كان وقت صيف وقرنسه وصاحبه خايف عليه من الحر فدخلوا عليه الأطفال وهرب عنهم الطير واصطدم بالشبك وجرح الطير فغضب عبود غضبا شديدا وبدأ بالصراخ على الأطفال وكاد أن يضربهم فأتى إليه أخيه الأصغر وهدأ من روعه وغضبه وقال له يجب عليك أن تحافظ على هذا الطير أو سأقوم بإطلاق سراحه فغضب عبود على أخيه وخرج الأصغر وفي الليل أتى إليه حاملا هذه الأبيات
الطير يا عبود يشكي من الحبس === ابوك حده ساعتين ويمله
هاذي ثلاث اسنين ما عانق الشمس === وليا نصحته قال مانتم هلله
ياعزتي للطير من ضيقة النفس === ليا غدا بالوكر شاف المذله
الطير يبغى خايع ما بعد عس === ما دوجوا فيه البداوين لله
فرد اخوه الكبير قائلا
وراك يابو النايفه خاطرك عمس === وانا احسب انك كل صعب تحله
اليوم يا سلطان ماهوب مثل امس === اخوك ماهوب الزمن صافيٍ له
والطير يا سلطان في ماكره ونس === حتيش لو ما صاد انا صايدٍ له
عقبت غبات البحور اطرد الخمس === وكل ورى شفه وعقله مدله
ضيدان وطيره
الشاعر المعروف ضيدان بن منصور بن قضعان العجمي اشترى طير وكان اسمه عند صاحبه الأول دهام ثم أطلق عليه ضيدان اسما جديدا هو فواز لغرض شخصي وعندما أراد ان يعشي الطير ناداه بأسمه الجديد فواز فواز ....
فالتفت إليه الطير وقال
ضيدان أنا أسمي دهام ماهوب فواز === أما أدعني يا دهام ولا بلاشي
ماهوب حق تغير أسمي بلا أرماز === وأنا عذاب الخرب لا أقبلت حاشي
فرد عليه ضيدان
لعيون بعض الناس سميت فواز === أسم يشابه لاسم صعب المناشي
اللي غلاه بثومة القلب حزاز === تقبل له طعوني وتقفي عطاشي
فرد الطير
ما أرضى تسميني عليها ولا جاز === تغيير الإسم إلا بذبح الكباشي
إذبح تميمه وأقلب الإسم فواز === إذا ذبحت الكبش ما صار ماشي
فرد ضيدان
قلت فواز تكفى فكني بالتلعواز === الحل عندي وأسمع العلم كاشي
لازم تشوف اللي لها القلب ينحاز === عقبٍ تجي فواز ولا شلاشي
فرد الطير
يالله مشينا والعمر يبغي إنجاز === يا ما نجز بالهدي ولا عراشي
قم جهز اللي ذاخرينه وممتاز === وعلي الطلاق إن عزبته من معاشي
وعنما وصلا إلى التي سمي الطير عليها شال ضيدان
البرقع عن الطير وقال له هذي اللي سميتك عليها فقال الطير
أنا أشهد إني يابن قضعان فواز === واني بعد فواز جاني خراشي
يا حظ قلبك يوم في حبها حاز === كحيلة ما عاشرة كل لاشي
يا ليتني رجلٍ لو أمشي بعكاز === وأنخاك وأنخى مبعدين المعاشي
وأنهض لطيف الروح وأجلا لشيراز === وأقضي بقايا العمر ما أحتر جاشي
في شرع أبن حنبل بتأكيد ابن باز === معروف راعي الحب قلبه هشاشي
وأنا لوصل ملوع الشيخ معتاز === أعوز من فراق السبوق الرواشي
أبا أتمنى والتمني به الغاز === يا ليت جنحاني لخلك فراشي
أو ليتني بيجر على الورك هزاز === وألا قلم بين الجسد والقماشي
مشهور
يا حمود انا في نقلت الطير مجبور === احب شوفه واستلذ بمطيره
ما همني العاذل ولو كثر الشور === من ردني عنه حشى مستشيره
اخذ على شانه لي ايام وشهور === اعتز في نقله وفكت جريره
لاجاء نهارٍ فيه قاهرٍ ومقهور === وكلٍ نقل طيره وجهز نسيره
وتدارجن ربد الحباري مع الخور === وخذت برقع من يعقد نظيره
تل ورقى وسم الولي دوم مذكور === يلحم ويشهر والصوايد شطيره
نشه بمخلابٍ على مشـة الـزور === وهوا كما تهوي الدلي وسط بيره
وانسرته المقسوم وعزلت مشهور === وشلته على كفك ولا لـك بغيـره
ثم شللت ربدا لهـا بالفضـا دور === قد وخذ منها ريش يالله الستيـره
تل ورقى مالد للخـرج والسـور === وادلى بكفه وحولت لـه كسيـره
جيته يدوس وخاطرك منه مسرور === ماتغبط اللي وسـط بنكـه يديـره
الشاعر بندر بن منصور
منقول
2008-01-24, 01:33 PM
قصص وسوالف اهل القنص والبر .........
العرض العادي
