<<< قـصـايـد مــــكــشــــاتـــيــــه روووعه للي يحبها>>>

[المميز]

السلام عليكم ورحمة الله وبركاته

بعض القصايد المكشاتية لشعراء كبار اتمنى تحوز على راضكم واعجابكم
الملك عبد العزيز بن عبد الرحمن الفيصل آل سعود
له أهتمامات كبيرة بالشعر وله قصائد عده ومحاورات متعدده مع بعض الشعراء وهذه من اشهر قصايدة ::

واهني الترف منسوع الجديلـه =ماضواه الليل دون مغرزاتـي
قاعد ٍ في البيت يبكي عزتي له =يوم شاف ركاب خله مقفياتـي
وردوهن هيت وأخطاه الدليلـه =والموارد غير هيت مقضباتي
روحن مثل القطا صوب الثميله =ضمر ٍ تضفي عليهن العباتـي
آه من قلب على جال المليلـه =لاتذكرت العصور الماضياتي
عصر من ينطح مقاديم الدبيله =لابتي لاجا نهـار الموجباتـي
من تعبث بالفرايض عزتي له =تقعده حدب السوف المرهفاتي

وهذه قصيده اخرى للشاعر بدر بن عواد الحويفي..
نصحوه ربعه ورفاقه بان يترك الصيد والقنص ويتوجه للتجاره .. فرد عليهم قائلا::



والله يلولا غايتي مانقل الطير = مانقل على كفي خفوق الجناحي
ابي اليا فزت تقل شعف معصير = واقفت تعقد مع سهال فياحي
ليا تلني واقفى يخطرف له السير = جايع وحاديه الزعل من صياحي
لاطقها بالصايدين المواخير = طاحت تدوس ونجم الطير صاحي
وليا حصل جول رتوع ومخامير = في ماقع عن نشر الادباش زاحي
وتركزن له تقل شول معاشير = وغزن غلبهن عقب ماهن مطاحي
منهن علق اللي مثل بكرة الظير = ونكد عليهن عقب ماهن ضواحي
وجيته يمزرها على القاع تمزير = يشلق معلق ثديها بالجناحي
هذيك والله منوتي يالمناعير = ان كان انا مجنون وان كنت صاحي
وكل برايه له تصرف وتدبير = ولاحد(ن)على الدنيا جلس واستراحي
وارزاق خلق الله وهايب وتقدير = ورزقي على مجري هبوب الرياحي
ولا ينقص الرجال كثر المخاسير = لصاردون الوجه ماهو سفاحي
والقل ما عذرب رجال بهم خير = والمال ماعز الرجال الشحاحي
مار اتركوني يالوجيه المسافير = هذاالذي وافق عليه اقتراحي


وهذي قصيدة للشاعر عبداللة بن مصبح يقول فيها ::


يامحلا لاشــدوا الجـيب بـالعفــــــــــــش =شــاصي وكمل عزبته عند جــابـــــي

جديد والبودي نظيف(ن) من الخــــــــدش = واللون بيج وماركبوه الشبـــــابــــي

واريل جهاز وفـــوق صـــدامـــه الونش =وكشــاف والدربـيل ضمن الزهــابـــي

ومقفـــص(ن) يبرالــه افضــل من البورش= بمسجله شرطــــان شعـــر وحجـابـــي

وخوة نشــامــا مــاحسـبوا يوم للقــرش = كبــار العقــول قـلوبهــم مــاتهـابــــي

بارض(ن) يجفل صيدهــا همل الطـــــرش = والفقع صلع شــال عنــــه التــــرابـــي

حول العيـــلي والرحـى والمطــــــر رش= وقبله جلـى عنا كثيف الظبـــــابـــــي

يازين مجلاس(ن) علـى الأرض والفـــرش = عشب(ن) مع البطحـا صبـغ بـالثيـابــي

وجمع الحـطب من قبل مانرمي القـــش= فـرس(ن) تـوقـد والغظــا بـالتهــــابــي

وسواة فنجـال(ن) على الجمـر ينعــش = لاروحـت ريحـــــه خــاطري منه طــابي

مع حلوة(ن) للجوف تمــــــره مجـــرش = او سكــــــــرين واستوى بحــر آبــــي

وبمعدنن من صنـــــعت الهند مــاغـش= شـــايـه ربيــع وســكــره دوب ذابـــي

هاذي منــاة العمــــر والعين ترمــش = وبـاقـي المنـــايـا لوغــدت لســـرابــــي

وصلاة ربــي عــد مــايــنزل الطـــش= على محمــد ســــورتــــه بــالكتــــابــــي


وهذي قصيدة للشاعر محمد بن صقيران يقول فيها ::


انا يجاذبني علـى البـر ثنتيـن
جمع الحطب ومعامـل الشاذليَّـة
إليا حذفت الغمر من فوق غمرين
وشبيت نـاري والليالـي مديَّـه
وراكيت صفر ٍ فال شماتهن شين
فنجالهن ما سيق لاهـل الرديَّـه
وعلى سناها سقت كيف العريبين
اسوق فنجالـي لزبـن الونيَّـه
في خايع ٍ منوة طليق الحجاجيـن
ما دوجوه اهل الدبش والرعيَّّـه
ولا وطوه مجهجلين الوراعيـن
اللي لهم في صيدة الضـب نيَّـه
قفر ٍ خلا وسمه تقافى نهاريـن
سيِّل دعوبـه مزنـة ٍ عقربيَّـه
فيه ام سالـم تستلـذ التلاحيـن
طير الربيع يجـاوب الراعبيَّـه
بارض ٍ نوايع عشبها يبهج العين
مـدة كريـم ٍ وافـي ٍ بالعطيَّـه
مع رفقة ٍ ربع ٍ كـرام ٍ مياميـن
كـل ٍ يبـدِّي للكرامـه خـويَّـه
مع رفقة ٍ فيهم رجوح الموازيـن
في سلمهم ما فيه هـاذي وذيَّـه
ناخذ من علوم الرجـال النقييـن
اهـل العلـوم الطيبـات النقيَّـه
سوالف ٍ صارت لاهلها نياشيـن
راحو وجزلات السواليـف حيَّـه
ناخذ مدى صولاتهـم بالمياديـن
في سجِّة ٍ بين السمـي وسميِّـه
سجّة زمان ولذة العمر يا حسين
لا سقت رجلي بالديـار العذيَّـه


... اتمنى موضوعي ينال على استحسان الجميع ... واللي عنده مثل هذي القصايد لايبخل علينا .. ولا أدري هذا المنتدى اللي يصلح فيه الموضوع ولا لا ...


اجمل وارق تحية

الـمـمـيـز

[محمد القحطاني]

بارك الله فيك اخي الكريم وجهد جبار تشكر عليه

قصائد ولا اروع صح لسانك وقصائد الطير جميلة جدا ومحببه للنفس

جزيت خيرا على هذا العمل

لك كل شكر وتقدير

[ابونورة]

الله يعطيك العافية

على القصايد الجميبة

مشكووووووووووووووووووور

[وميض البرق]

اهلا بالمميز المتميز في اختياراته
قصايد مشهوره اضفت على المنتدى رونق جميل

[ضحوي]

يازين مجلاس(ن) علـى الأرض والفـرش = عشب(ن) مع البطحـا صبغ بـالثيـابي
وجمع الحـطب من قبل مانرمي القـش= فـرس(ن) تـوقـد والغظـا بـالتهابي
وسواة فنجـال(ن) على الجمر ينعش = لاروحـت ريحه خــاطري منه طــابي

رائع يالمميز كعادتك دائما
بارك الله فيك

[ابونورة]

يادحيم روحي على الصمان ولهان ...ـهفي رقةٍ يابو فايز في الخلاء الخالي

أشوف عشب الخزامى زانت الوانه ... رزقٍ رزقنا عظيم الشـان والوالـي

البر يجلي هموم القلـب وأحزانـه ...أنا أشهد إنه دواء قلبي وغربالـي

الخير جانا وسالـت كـل شعبانـه ...من مزنةٍ سيلـت والسيـل همالـي

والارض صارت من الأمطار مليانه ...والعشب زهر وصار الوان وأشكالي

والكل نفسه بشوف الروض شفقانه ...يمشي ويضحك وكـلٍ دالـهٍ سالـي

والبل ترعى وتسرح بين فيضانـه ...عقب الربيع أصبحت تمشي وتختالي

ودعت ربعي ومنزالي علـى شانـه ...ومسكت خطٍ حوته رمـال وجبالـي

سكنت وسط الخلاء والنفس فرحانه ...في قفرةٍ ماوطتهـا رجـل رجالـي

وحمست كيفٍ يِشوق الراس فنجانه ...ودقيتها وسط نجرٍ يذهـل إذهالـي

وحطيت أنا بهارها وأحكمت ميزانه ...وصبيتها وسط صفرٍ تبري الحالـي

ياليتنـي ساكـنٍ مابيـن ريضانـه ...وأنسى المدينة وأعيش العمر رحالي

كتبت بيت الشعر وأبدعـت قيفانـه ...ونظمت لك يالسنافي بيوتٍ إجزالـي



أرجو أن تحوز على رضاكم ..

تركي بن علي الفيصل

[عبدالهادي المفرج التميمي]

ابشر بعزك وابدور على كم قصيدة واجيبهن لكم

مشكووووووووووووووور وصح لسانك



سلام

[المميز]

يعطيكم العافية على الرد وزيارة القصائد ’’’’’ و أشكر أبو نورة على قصيدة الشاعر / خالد الفيصل ’’’’’

[ابو فرح]

صح لسان الشعراء

ومشكور على اختيارك وانتقاءك لهذه القصائد

[معدي المرقاب]

اخوي المميز الله يعطيك العافيه

على اختيارك المميز

مشكوووووووووووور