قاطع اخته 20 عام
(اذا لم يتم طرحها مسبقاً)
هذي القصيده للشاعر : حمود الشمري الذي وصلته رساله من اخته بعدانقطاع 20 عام
تعاتبه وتنخاه فيها
فقال هذه القصيده المؤثره والتي تقطع القلب.
ياخواني، الله الله بخواتكم، والله اختك تفرح لو بمكالمه..
بالذات اللي خواته متزوجات تراها تفتخر فيك قدام زوجها
لو انه ابو عيالها انت عندها غير .. وتباهى فيك فلا تكسر خاطرها بانقطاعك عنها ..
الله يجعلنا ممن يصلون الارحام
الله يتجاوز عن تقصيرنا بأرحامنا
الله يصلح احوالنا واحوال المسلمين
كلمات القصيده : ويليها المقطع للاستماع
لتستمع للقصيدة اذا كنت من اصحاب القلوب الضعيفة.
جتني رسالة من صدى خافق الروح
وقريتها بإحساس قلبـي وروحـي
قريتها وانهدّت قصـور وصـروح
وأنا من أول عالياتـن صروحـي
تشكي تقول القلب يا حمود مجروح
ما تدري انـي غايراتـن جروحـي
تهلّ دمع وترفع الصـوت بالنـوح
واللـي فقـد غاليـه لازم ينوحـي
ما كلّمتني يمكن الصـوت مبحـوح
من النوح وإلا ما استطاعت تبوحي
جتني رسالتها بها دموع وجـروح
وانهَد باسباب الرسالـة طموحـي
تقول ياحمود الزمن صار مفضـوح
والشيب فيني لو تشوفـه يلوحـي
يا بو علي مالي بالأغراب مصلوح
مادام قلب اللـي نحبـه شحوحـي
ودّي بشوفك دام الأعمار بفسـوح
قبل الرحم يا خوي منـا يروحـي
زلّ الزمان اللي به أفراح ومـزوح
أنخـاك تكفـى لا تظنّـه مزوحـي
وبعد الرسالة صار بالقلب ذابـوح
طار المنام وصار فكـري يشوحـي
أختي رسالتها لها القلـب مفتـوح
كلّي لها والقلب ينصـت ويوحـي
أقولها ودموع عينـي لهـا فـوح
وسط المحاجر دمع عيني يفوحـي
أجاوب الورقا على عالـي الـدّوح
وأنوح من فرقا الرفيق السموحـي
والله لو إني وسط الأطباق مذبـوح
لأظهر كما خطو الحصان الجموحي
وأقول يا عين المها ما بها شروح
لو تطلبين الروح تفـداك روحـي.
المقطع الصوتي
تحياتي
-