على كثر ماسمعت من اللغو بالكلام
الوقت بـ الردّ ، والله اني استكثره
اللي يجيني هلا به عدّ سرب الحمام
و ان راح ما عندي الا الخير فيه اذكره
يستوفي الفجر دايم حقه من الظلام
ما قال : وينه جديل الشمس ما تنثره
اسابق احلام عمري و استبيح الغمام
و اطلب من الصبر لجل احلامي المغفرة
دامي عرفت الحلال و ما كليت الحرام
و عمري بـ بيض النوايا انقضى اكثره
اخترت اهادن حياتي فضلاً عن الصدام
و افرح بحلو النصيب ان هدّني اقشرَه
مالي مع الناس غير الصدق و الاحترام
و اللي يطيبون فيني طيبهم مَ انكره
الناس مابيدها الجنّة و حسن الختام
تجفى و تقسى مع ان العفو بالمقدرة
آمنت بـ ان المشاعر تنولد بالخصام
لو مال غصن المعاتب لا تجي تكسره
اي والله اني اجامل لو عيوبك جسام
و لو ما اجامل تراك اول بشر اخسره !
من يصحي الصبح لين الصبح ثاني ينام
وانا شعور الرضى من قلبي استشعره
للمنشغل في حياتي عن حياته : سلام
ومن كل قلبي على حرصه انا اشكره
وارفه.