من قصائد أخي بالله الشاعر / سعود الشايع
ذعذع هواها وِصدِقَتْ في وعدها
سحابت(ن) ما مثلها يالمخاليق
ساقه لنا الغربي وثم(ن) عقدها
بامر الولي يوم استدارت تشاريق
يوم ارْزِمَتْ ولّعْ بها من رعدها
برقٍ تبسّم فوق عالي الشواهيق
طشّتْ ..ورشّتْ.. ثم هلّتْ بَرَدْها
يشلخ بياضه مثل لون الغرانيق
شِرْبَ الغدير وكل تلعه صعدها
وسال الشعيب اللي نمتْ بَه زماليق
وغنّت طيور الما طرب من سعدها
تسمع لها عزفٍ على فكة الريق
يوم انكُفَتْ شبيت نارٍ عمدها
سَمْرِ(ن)على جاله دلالٍ واباريق
مع تمرةٍ من صاحب(ن) لي حصدها
آخر لقاط العام حبّه تفاريق
حلوه (رميثيه) تقاطر شَهَدْها
لا ذقتها تبتل كل المعاليق
سعود الشايع
أتمنى أن أراه وهو بأتم الصحة والسعادة ..
لي عوده بإذن الله ..
تحيتي