بين طيات الورق وآخر ابداع القصيد
قلت أبكتب عن حياتي وابشرح قصتي
قصتي تحكي عن الحظ والهم العنيد
والحزن والضيق والآه تحرق فرحتي
ذي حياتي مابها لا جديد ولا مفيد
غير ونات ن بقلبي تسابق عبرتي
قل ما عندي ولو كان لي رأي ن سديد
ياهل المعروف دايم يسبب حيرتي
لو بغيت أدلّه النفس وآروّح بعيد
ضاق صدري ياجماعة وحانت جيتي
عذت بالرحمن من شر شيطان ن مريد
وأذكر الله قادر إنه يبدل حسرتي
أَستعينك والتجي وَأَنت ذو العرش المجيد
اجل همي يا إلٰهي وضاعف حسنتي
يا لله الخالق لك الأَمْر تفعل ماتريد
طالبك ياخالق الكون كفّر سيتي
ماكذبت وربي اللي على وضعي شهيد
لو خفا سري عن الخلق يعلم نيتي
يأهل الفزعات والجود والعقل الرشيد
إفزعوا لي يا ملا لا سمعتوا صرختي
أَتسلى بالقصايد وبدعي للنشيد
لكن الحاجه تراها تنجض كيتي
ماسلا الخاطر وهمي مع الحاجه يزيد
صدمة الموتر بعد قيدت حريتي
لو يمر الوقت ماجاب لي علم ن جديد
يالله إني طالبك لا تطوّل شدتي
من جهل في حالتي لا يظن إني سعيد
قل ما عندي بلا شك سبب غصتي
أشتكي للخالق الفرد خلاق العبيد
ربي القادر إلهي يفرج كربتي