[سحاب شقراء]

المشاركة الأصلية كتبت بواسطة تميم بن محمد

وسيلة التنقل بين مدن المملكة منول اما لوري او كنور او مرسيدس سكس
يقول انا في المقيبرة و اشوف ناس متجمعين يبون يسافرون للقصيم
اثاري الراجحي معهم و ماسك في يده كيس و كلن يحسبه دراهم عشانه شغال في الصرافة يقول يوم ركبوا في اللوري و يقوم واحد من الركاب و يفغص الكيس حق الراجحي باصبع رجله يبي يتحسسه يشوف هي دراهم ولا اثاريها لقم( رز يابس للغنم) يجمعه الراجحي و يرسله لاهله في القصيم شف شلون جمع الدراهم و الان من اغنى اغنياء البلد

سبحان الرزاق الوهاب هو المعطي ولا فيه ناس تعبو اكثر من الراجحي ولا حصلو شي

هذي وهايب من رب الوهايب جل جلاله

يرزق من يشاء بدون حساب

نرجع للمقيبره هههههههه
تصدق منول نشري الدناميت من المقيبره كانو يبيعونه في زبلان ورخيص بعد ونشد ابوك عنه
ونحن نشريه علشان اذا فيه قليب ونسميها منول الركيه تبي من يحفر لها علشان يزيد الجم فيها
ويصير مثل فيه حصا يبي من يكسره نقوم طال عمرك ونشق شق في الحصات ونحط اصبع الدينميت في الشق وكل ماتضوق الفتحه يكون التفجير اقوا ونطلع من القليب ومعنا سلك ومعنا بطاريه نسميها منول حجره ونحط سلك تحت وسلك فوق ثمن اللهم عافنا تسمع التفجير
وكثر مانخاف عليه ان القليب تنهد انت خابر القلبان تصير مطويه بالحصا وقرون الحصا

تصدق اني اعرف اطوي الحصا في القليب بس بذا العمر مقوا اشيل ولا احط يالله اشيل عمري ولاهوب قبل بعد
هماي اقول في قصيده لي

ولا الشباب وبروق الاحزان لاحت

وقامت تكاشف مزنه العمر وتسري

وكنت احسب الدنيا تبيني وراحت

وقفت ركايبها عن الحال بدري

سحاب شقراء

هذي بعض القصيده نسيتها ابشرك هههههههه