يابو حمد عيني تعاف المناما
وش حيلتي يبن الرجال الكراما
ياكيف ابرقد يا نزيه السريرة
وبوي يشكي من جروح ٍ عظاما
من بعد أبويه حالتي ما تسرا
محتار من بعده وفكري عداما
يابوي ياروحي ويا راس مالي
بيتك بعد ما رحت عنّه ظلاما
حارت بي الدنيا وضاقت دروبي
يابوي والله ماهتني بالطعاما
كلما دخلت البيت أذكر خيالك
هليت دمع ٍ مثل وبل الغماما
لاشفت أنا ثوبك ومفرش منامك
قبلتهن بشعور صدق الغراما
فقده أنا صوتك وبسمة شفاتك
فقده أنا عطفك عليّه دواما
يابوي من بعدك صراحة حزيني
كن الحزن جيش ٍ رماني بسهاما
يابوي مصحفكم له اسنين ضايق
تقرابه القرآن فرض وقياما
آذانكم يصدح بكل المناير
وياما على صوتك سرور الصياما
خمسين عام ٍ والملا يشهدوني
وأنته على التوقيت خير العلاما
لامن وقفت أذن مكانك تنهدت
وأسكبت دمعي فوق خدي سجاما
وأنته طريح فراش في وسط مشفى
عسى الولي يشفي جميع السقاما
شيخ ٍ كريم الطبع في الناس نادر
بالخير والمعروف رجل ٍ إماما
مسكين قلبي كلما جاه طاريك
أصبحت واكني كسير العظاما
كم ليله ٍ دمعي تداعب جفوني
طير الحزن في داخل الجوف حاما
ياليت من يملك دواكم وطبك
واشوفكم دايم بخير وسلاما
لاكن فلا لي يايبه كود دعوه
يشفيك رب الكون رب الأناما
أهم شي ٍ كلما مرّ ذكرك
تدعي لك العربان غرب ٍ وشاما