|
@@ (( قصة وقصيدة ( عجب ونوير ) شي ماتتخيليه تعال واقراء حياك )) @@
السلام عليكم ورحة الله وبركاته ،،، مساء الخير والمسرة للجميع ،،، وشلونكم ياهل البراري عساكم بخير كلكم ،،، الحقيقة اخوكم ابو هليبه اليوم حب انه يتحفكم بمشاركة متواضعة لن تصل الى مستوى ذائقتكم ، مير عزاي انكم اخوان واخوات هنا ترتقي بكم اي مشاركة بمجرد مروركم عليها ومشاركتكم لي موضوعها كعادتكم لاهنتوا جميع ،،، مشاركتي اليوم عبارة عن قصة وقصيدة ،،، نبداء بسم الله يامعين اعني ياكريم ،،، قصتنا اليوم جات من وسط المجتمع البدوي ،،، ومن اعماق اماكن الشهامة ،،، ومن انفس جواهر الشيم ،،، واغلا درر التضحيات ،،، ونوادر مواقف الكرم والرجولة ،،، قصتنا هذا اليوم تحكي لنا مايلي : العشق العفيف حينما يتجلا ظاهراً للعيان ولكن باسلوب كان اعظم من ان ينقده ناقد او يحجمة متذوق بل كان كما هو وبلا اضافات تذكر ،،، وتحكي اساليب التبيان بطريقة تكاد خيالية ولكن كانت ولازالت هي لغة اناس منحهم الله هبة ونعمة ومقدرة ثمينة الا وهي ( الشعر ) ،،، ستحكي لنا ايضاً عن موطن من مواطن الاحساس والشعور حينما يلد لايصنع صناعة وحينما يتغلغل في احشاء ذلك العضو العجيب ( القلب ) انه ( الحب حينما يولد ) ،،، فكانت وكان لنا معكم ولكم مايلي : وساتحدث لكم بالعامية لأسباب لاتخفاكم ،،، كان فيه رجال اسمه ( عجب ) صاحب جاه وفروسية وعقيد ربع وزيزوم قوم وكان فيه من كل صفات الرياجيل الحميدة ولله الكمال سبحانة ولكن كان رجل بمعنى الكلمة والمعنى وفوق هذا كله كان شاعر ومتمكن باعجوبة،،، وكان هالرجال هويان بنت من بنات ربعة وابوها يقال له ( ابن شامان ) ،،، ماهوب قليل عنه بشي كان فارس وشجاع وكريم وشاعر ايضاً ،،، المهم هالرجال تمكن منه حب البنت تمكن فضيع وكانت البنت ذات جمال يوسفي وصفاتها تحمل عجب العجاب والحريم كانن يخافن منها انها تجي عليهن ضرة من زود جمالها وحسنها وكانت شاعره وقوية في نضم الحرف واشعارها مشتهرة بين اوساطهن ويتداولن ماطاب لهن منها ،،، المهم هالرجال ومن حشمته لبنت عمه ماكان يبي يرد فيها نشيدة رغم ان القصيد في هاك الوقت كان مستساغ ومقبول في غرض كهذا ( رغبة الزواج ) ولكن كان هو اجمل من ان ينشد او يغني فيها ببيت او قصيدة ،،، وهي بعد كانت هاويته هواً مو طبيعي وتحبه وتغليه وتبيه زوج لها على شرع الله ،،، وكان اسمها ( نوير بنت ابن شامان ) ،،، وفي يوم من الايام الله راد سبحانه على هالرجال انه يجيه واحداً من ربعه شيخ وله مكانة عنده يعزه ويغليه حيل ولاينقصة من علوم الرياجيل شي ابد وشاعر بعد مثله ،،، وكان اسمه ( صميدع ) اسم على مسمى ،،، ويوم تقهوا عنده قال ياعجب انا ابيك في لازم وانا ولد عمك تكفى ،،، قال عجب : انت تامر امر ياولد العم وش تبي بس ،،، قال : ابيك تروح معي للأبن شامان ( يقصد ابو البنت اللي يحبها هو ) ،،، قال عجب : وش تبي منه عسى خير ان شاء الله ،،، قال : والله ماهنا الا الخير ابيك تخطب بنته نوير لي ابيها زوجة ٍ لي وانت جاهك ياولد عمي عزيز ولا ينرد ابد ،،، عاد عجب لا لبس غترته وعقاله وبشته لو هي رقبة فكها من تحت السيف لان جاهه معروف وله حشمة عن كل الرياجيل ،،، ويوم سمع هالكلام عجب تأثر وحزن وانصدم لكن ماورّا ولد عمه لون ابد ،،، قال له ابشر ارواح هيا يمهم نخطبها لك والله يقسم اللي فيه خير ،،، المهم جوا عند ابن شامان ورحب فيهم وقلطهم وسط المروبع ( من اوسع بيوت الشعر) وقال للقهوجي واسمه ( قنيت ) ياقنيت سوق الدلة ،،، والبنت تسمع وتدري عن محبوبها انه جالس مع ابوها وكانت تحسب انه جاي يخطبها لنفسه مير ماهنا شي من اللي تبيه وتتمناه ( ياوي من الهوى واهل الهوى ) وجات الدلة وانساق فنجالها ويوم جاه الفنجال وطاه بحشمة قدامه وعرف ابن شامان انه مطلوب وللضيوف حاجة عنده ،،، وقال : اشرب فنجالك ياعجب وارفع صدرك عني ومطلوبك ملبى ان راد الله ،،، قال عجب : ان بغيتني اشرب قهوتك عطني مطلوبي !!! قال ابن شامان : اشرب فنجالك لايبرد وابشر لو هي رقبة ولدي شامان جاتك ،،، قال عجب : حنا جايين طلابه لبنتك نوير ( لولد عمي صميدع اللي يسمع حسك ) ،،، تفاجأت نوير وبغى يغمى عليها من الدهشه والصدمة والغلط والكارثة ،،، قال ابن شامان : جتكم وانا ابن شامان الا من المشورة ( يقصد يبي يشاورها عليه ) قال عجب : شاورها وولد عمي ترى ماله حلي ولاشبيه وزيزوم ربعنا وانت تعرفه يابن شامان والقبايل كلها تعرفه ( الله من الوفاء والكيل الوافي عجيب عجب هذا ) عاد البنت يوم سمعت هالحكي من عجب وطريقته المفاجأة لها ،،، ( عرفت انه مجبور على جاهته وانه ماسوى كذا الا وفاء وكرم لأبن عمه وانها لازم تخلصه من الورطة اللي هو فيها وتنقذه وتنقذ نفسها من هالزواج بطريقة تحفظ كرامتها وكرامته وسمعته وسمعتها بعد ) ،،، المهم جاها ابوها وعلمها بالعم كله وقالت يايبه انا موافقه بس بشرط ،،، قال ابوها : وش شروطة يابنت !!!!! هذا عجب ماتلا عليه شروط وانا ابوك ،،، قالت ابد شرطي اول وآخر وان كان ودك تغصبني قلهم موافقة يايبه ،،، قال ابوها لابالله ما اغصبك هاتي شرطك ،،، قالت : انا بعطيك قصيدة ابيك تهلها عليهم وعقبها تسمع جوابي منهم قبل يجيك مني ، قال ابوها : زين هاتي القصيدة ،،، وقالت نوير ياعل اللاش يفداها ،،، ياهن ضامينك على غير ميـــــــــــــــــراد ومن الضما دوك الرشا بالمحـــــــــــــاله طردي حقاق وطرد مثلك هجـــــــــــــــاد ومن الغيا جبت السراب بعجــــــــــــــاله ليل ٍ نزل بدره علينا بالاشهــــــــــــــــاد وسط المروبع مير ليته لحــــــــــــــــاله ياوي لو انه لفانا ونشـــــــــــــــــــــــاد جت له عربنا طوع مابه جمـــــــــــــاله قل للصميدع مالنا فيه نقــــــــــــــــــــاد ولا ينكره 00 جعل التوافيق فــــــــــاله مير الطراقي حطحط الزمل بجهـــــــــاد وثـــنــوا ركايبهـــــــم ولا فـــــيه قــاله حنا نزلنا وسط سوق ٍ له اسيااااااااااااااد واخذوا بضايعنا وجابوا ريــــــــــــــــاله ماعاد باقي كود مذخور الاكباااااااااااااااد امــا شـــروا والا غــــديـنـا بحــــــــــاله ويوم قضى ابن شامان من القصيدة عرف صميدع ان البنت هويانة ولد عمه عجب وانها تبيه حليل ٍ لها ولاتبي غيره ابد ،،، وهو يناظر في عجب مندهش من موقفة ورجولته ،،، وقال له عجب : لاتزيد الهرج ياصميدع حنا جينا هنا نبيها لك مانبيها لغيرك يشهد الله ،،، قال صميدع لابالله الا شوف عيني حظ غيري ( مير عساها تهناه ) يقصده هو ،،، وقام وقال هالبيوت رداً عليها ووفاءاً لأبن عمه عجب اللي ضحى بقلبه عشانه ،،، قال صميدع : ياقنيت سوق الكيف لاتذخر قناد وعده عليه يوم جاني مجـــــاله ثم قل لأبن شامان وعلومنا جداد ياخذ من الصلفات وان طاب حاله عد ٍ وردته ،، للعجب صار ميراد والنفس شامت عن مهاجي جماله ان ماتهيت له على خير منقاااااااد والا ترى فنجال كيفك لحاااااااااااله (( وافي وربي ياصميدع بيض الله وجهك يالقرم )) ويوم جات الدلة واخذ الفنجال صميدع حلف وحرم انه مايذوق القهوة ابد ان كان ماجاه طلبه من عند ابن شامان ،،، قال ابن شامان ابشر وش تبي ياصميدع ،،، قال صيدع : ابي بنتك نوير لولد عمي عجب ،،، تعجب ابن شامان من الموقف واختلاف الموضوع بهالسرعة وعرف ان المقصود في القصيدة حقت بنته هو عجب وانها هويانه عجب ،،، (( قال خذيته من وسط بيتي !!! الله يكفيني شرك وانا ابوك هههههه )) قال تراها جتك ياعجب الا من المشورة بشاورها عليك ،،، وراح شاورها ووافقت المزيونة ،،، هههههههههه وانتهت القصة واعماركم اطول جميع ،،، والقصة والقصايد لأبو هليبه من بنات افكاري بغرض الامتاع لا اكثر ،،، ليست موجودة في الكتب ولا في المجلات ،،، @@ (( ملاحظة مهمة ،،، )) @@ انا طرحت هالقصة في كذا منتدى لكن يشهد الله طرحتها عندكم هنا في البراري بلون آخر واضافات جديدة حصري لكم وتستاهلون والله ،،، ( ابو هليبه ) |
ابو هليبه ابدااااع من قطع النظير
رااائعه بما تعنيه الكلمه الله يسعدك ويعطيك العافيه |
أبوهليبه
سرد خيالي جميل جدا فيه من ألاثارة والاهتمام و الإمتاع و تثقيف القراء شكرًا لك على القصة الجميلة |
اقتباس:
الذيب الرمادي ،،، الله يسعدك يالقرم ويبيض وجهك ،،، لاصارت جازت لك هذا شرف لي وربي يالغالي ،،، |
اقتباس:
ابا محمد ،،، شرفتني يالضرغام بمرورك واشادتك المقدرة ،،، هذا من طيب اصلك وكرم اخلاقك يالوافي ،،، |
ابو بندر
طيب الله فالك يالقرم انشهد انك ماقصرت طال عمرك قصة قمة في الروعة وسياقة ممتازة راقت لنا كثيرا واقدر لك جدا ماقضيته من وقت في سياقة القصة والابيات الممتعة كما اكرمتنا نكرمك بما يمكن ونستطيعه تستحق التميز والتقييم الكامل |
اقتباس:
وفالك يطيب يابنت الاجواد ،،، شكراً مليون ولايسدون على هالاهتمام اختي سراب ،،، |
الله لااا يضرك ياابوبندر
ويحفظك بعينه التي لااااتناااام... أنا شهادتي فيك مجروحه .. وااااصل ياابطل فااالك العلم الغاانم ،،، |
اقتباس:
حياك الله ياعابر ،،، ماهنا الا الشرف بمرورك لاهنت ،،، |
أبو هليبه
صح لسااانك مليوون ولا يسدووون يابعدي رائعه من اجمل ماقرأت أسرة البراري للشكاوى و الإقتراحات والإستفسارات (لايراه عدا الإدارة وكاتب الموضوع) أتمنى أن تكتب كلمة الحق اللي قلتها في منتدى أسرة البراري وسلمت يالغالي عنيد |
| الساعة الآن 12:24 PM |
Powered by vBulletin .
جميع الحقوق محفوظة © لشبكة ومنتديات البراري 2010